Ka Khasi Students’ Union (KSU) Narpuh Circle ynne ka sngi da yoh wow pyndep yei saam khusnaam ya kawa tip kama ka 10th Mait Shaphrang Academic Award 2021 kawa da pynman ha ka Lumshnong Community Hall.
Ya kani ka khusnaam da saam cha ki 44 ngut ki khynroo khyllood ka thaaiñ Narpuh kiwa da yoh 1st Division ha ka SSLC, HSSLC, Graduate wa Masters Degree yong uni u snem 2021.
U Daniel Khyriem, President wa da chong ngiah ka KSU CEC da man u kam u kongsan wa u Shiningstar Kharbihkhiew, Asst. Education Secretary KSU CEC kam u symbood kongsan.
Neiliang u Daniel Khyriem hawa e yei klam da kyntu u ya ki khynroo khyllood wym toh u pynsepai yei por wei ym toh u pynsepai leh ya iwa phah lai puræ puthi ki bei ki pa yong ki.
Da pynsñiaw u leh yei sñiawsih yei chah ktah chyrkhei ka rymaw deiwa kyntu ya kiwa yahkhmat chnong wow chimkhia ki yeini yow lait u chah tim ha ka pateiñ ki khon ki kti.
U Shining won da ong u wa ym toh wow sñiawsarong hawa pyndep ya kawon kawon ka kyrdan puræ wei wow chim ya kani ka khusnaam yow kynjoh chooh chooh ya kiwi ki moomær.
Kiwi de kiwa klam toh u President Synjuk Waheh Chnong EJH, u Satley Ryngkhlem uwa man leh u Vice President, KSU Khliehriat Circle, u R Moling Bamon, President wa nyngkong ka KSU Narpuh Circle, u Streamly N Suchen, Finance Secretary KSU JHDU wa u Ohibait Dkhar, President KSU JHDU.
Da pynlai ya ka yalang da u KS Suchiang, President KSU Narpuh Circle.
