Ka Meghalaya dang bood ko nadien ya ka Manipur da 111 Run hadooh wa kut ka yalehke ha ka sngi nyngkong ka Cooch Behar Trophy U-19 kawa man ka yalehke wa soo sngi ha Bhubaneshwar ynne ka sngi.
Ka Meghalaya kawa jop ya ka kylla khlem da phah Bat nyngkong ko ya ka Manipur. Hawa kdong Run ka Meghalaya da yoh ko 86/6 hawa jubab yeiwa kamai ka Manipur ha ka First Innings da 197/10.
Ka Manipur leh ha iwi i por da yoh ko 33/4 hadien wa u Bharat Gurung da yoh u wow pynhaap 3 Wicket na ki soo tylli ki bol.
Tangwa u Jotin Pheiroijam da kamai u 131 Run ya ka Manipur khlem da yoh lok hadien wa haap ma haap ki Wicket wa wan Bat lang wa oo heiwa oo leh da haap u ha uwa kawang bol, u Raghav Magotra.
Hawa kut, u Gurung da yoh u 3/55, u Magotra (2/25), u PM Santhosh (2/27) wa u Manish Sharma (2/55) ya ka Meghalaya.
Kiwa sdang yei kamai Run ya ka Meghalaya kitæ u Anmol Sunar wa u Mrinal Das da sdang ki deiwa skem tangwa u Das da haap noh u hadien wa kamai 15 Run heiwa kiwi kiwa wan Bat hadien ym ye ki wow poi cha ka 10 Run deiwa lehbha uwa kawang bol ka Manipur, u Kadamjit uwa yoh 5 Wicket na ki 8 Over.
Ya ka Meghalaya da lehbha u Das uwa da kamai 49 Not Out. Hawa kut ka yalehke, da yoh lok lang u wa u Gurung (5 Not Out) yow pteiñ biang mynstep yow chem ya ka Manipur.
