U DIG yong ki chipai khappood ka ri, ka Border Security Force (BSF) Meghalaya Frontier, u D. Haokip da ong u wa ka seiñ kieñ suloi wa man pyrchah aiñ ha ka jylla, ka Hynñiewtrep National Liberation Council (HNLC) ym em ktem de ko ha Bangladesh heiwa da ong u wa em du kajiak ngut donhi ki dkhot kiwa da lai cha Bangladesh neibhah wa em ki kiwa hayung wa kiwa kyrchaan ya ki cha chiliang u pood.
Ha iwi tawon i liang won u DIG da ong u wa em ki seiñ kiwa da pynman ya ka Bangladesh kam ka thaw rieh tngen heiwa da ong u wa man iwa eh wow tip yei boon yong ki, tangwa da ong u wa katkam ka yutip wa da yoh ki BSF em chiboon ki seiñ ha kani ka ri khamtam ha ki bynta ka Chittagong Hills wa ki thaw khappood wa ka Meghalaya, hanla neipor cheipor ka sorkar Bangladesh wa ki chipai ka BGB kyntait ki wa em ki seiñ ha kani ka ri.
Hajrong i khyrrup masi wa da chalan tooh cha Bangladesh, da ong u wa i chalan tooh ya ki masi da duna bha i hadien wa ka sorkar Assam da wanrah ko ya ka aiñ yada masi, ka Assam Cattle Preservation Act, 2021.
U Haokip da ong u leh wa katkam ka yukheiñ wa da yoh, ki masi wa thmu wow chalan tooh wei kiwa da yoh khyrrup ki BSF da duna bha ki hawa nujor wa u snem wa dadep.
