Hadien wa da ujor ka Congress pyrchah ya ki MLA kiwa da yut seiñ ha u Lamphang ka yung dorbar chna-aiñ, u Metbah Lyngdoh yow pyndam noh yei man ki kam ki MLA katkam ka kyndon ka 10th Schedule ka riti synchaar ka ri.
Ynne ka sngi neiliang u Commissioner & Secretary, Meghalaya Legislative Assembly da thoh u cha u Dr. Mukul Sangma hajrong ini i ujor wa e da ka Dr. M Ampareen Lyngdoh kawa man katni kam kawa yahkhmat ka Congress Legislative Party (CLP) wa u Lamphang da pdiang u ya kani ka ujor wow pyndam noh yei man MLA.
Da pyntip cha u Dr. Mukul wa ka ujor da kdaw ko leh ya ka Rule 6 ka The Members of Meghalaya Legislative Assembly (Disqualification on Ground of Defection) Rules, 1988. Kamtæ u Lamphang da phah u ya kani ka ujor cha u Dr. Mukul yow puræ bniah u ka yow ye u wow e yei jubab katkam ka Rule 7(3)(b) kawa toh u e hapoh 7 sngi cha u Meghalaya Legislative Assembly Secretariat.
Neiliang ka Dr. Ampareen da ong ko wa emkaam wa u Lamphang u leh smat u yei kaam wei wow lai chakhmat deiwa ong wa sñiawskem ko wa biang ka yurim wow pyndooh yei man MLA u Dr. Mukul wa kiwi de.
Chooh chooh da pyntip ko wa da ujor ko pyrchah ya waroh ki MLA lait noh ya u Charles Pyngrope wa u Shitlang Pale wei daw ujor ko leh pyrchah ya kini ha kini ki chi sngi ar sngi wow wan.
Da ong ko wa ini man ko leh kam chibynta i hok kiwa thap Vote yow pyntikna wa kiwa mihkhmat yong ki wym kheiñstiñ ki yei synchaar paidbah.
