U Changkam M Sangma uwa man kam u State Vice-President ka NSUI Meghalaya da thoh u cha u National President ka NSUI wow mih noh u kam u dkhot kamjooh da ieh u yei kaam yong oo kam u Vice-President.
Ka NSUI (National Students’ Union of India) toh ka chnat ki khynroo khyllood wa dang lai puræ ka Indian National Congress kawa da seiñ ha u snem 1971 da ka Indira Gandhi hadien wa pynyabi lang ya ka Kerala Students Union waka West Bengal State Chhatra Parishad yow pynmih syndon da ka wi ka seiñ hapoh ka ri.
Neiliang u Sangma ha ka chithi ieh kaam da ong u wa ym em artatien u ya ki yurim wa bha ka Congress tangwa hei yahkhmat ki kattu katni hapoh ka State PCC da yoo la kamwa kyndeh ke Chess deiwa thung hi-eh kat da uwa em wow ksoh kaam khlem da pyntip chwa.
Kamtæ da ong u wa dap u deiwa sñiawsih wa hap u wow ieh noh ya waroh ki kaam wa da ksoh deiwa e khublei leh ya ka NSUI waka Indian National Congress ya ki kabu wa da e ki wow chakri ya ki bru ha kiwa boon ki kyrdan.
Kam wow pynkynmoo wa hadien wa yut 12 ngut ki MLA, ka Congress da pynbna ko ya kiwa boon kiwa ksoh ya ki kyrdan waphær waphær.
