Ki seiñbhalang napoh East Jaiñtia Hills District, kiwa kynthup ya ka EJNC, JSM, KSU, JSU, FKJGP, HNYF wa HANM ha ka yalang wa da pynman ynnin i janmiet ka 2 tarik da iwi i sur da rai wow kyntu ya u Montri Rangbah ka jylla, u Conrad K Sangma wow phah biang ya u E. Kharmalki kam u Deputy Commissioner wa pura yong ka East Jaiñtia Hills District.
Ya ini i rai da chim hajrong ka yurim wa hadooh katni ka sorkar ym pu phah ko ya u DC wa pura yong ka East Jaiñtia heiwa da thung hi-eh ya u S.S Syiemlieh, ADC kam u DC In-charge wa chi por yong ka District.
Heijooh i por leh da rai wow phah leh dei thoh cha u Conrad K Sangma, Montri Rangbah ka jylla hajrong i angnood yong kiwa chong yong ka District wow phah biang ya u E. Kharmalki kam u DC wa pura yong ka East Jaiñtia Hills District, wei lada ka sorkar em ko yei thmu wow phah noh da u uwi won u DC hapoh ka District, neiliang ki 7 seiñ da klam che wa i yakhih paidbah kawa joor da yang chwa hapoh ka District.
Neiliang ki 7 seiñ da pyntip ki leh wa hadien wa da tip wa u Montri Rangbah, ka jylla daw wan wai u ya ka SHG Mela hapoh ka District ha ka 8 tarik uni u bnai, da chim ya ka rai wow pynman da ka yakhih wa jai-jai ha katai ka sngi kam i dak wow pynyoo yei pyrchah yong ki yei kyrriah kaam yong ka sorkar jylla ya u DC warim tangwa hadien kattu katni sngi da tip wa neiliang u Montri Rangbah da pynpep noh u yei thmu wan wai ya ka SHG Mela kamtæ neiliang ki 7 seiñ leh da pyndam ki yei thmu wow pynman ya ka yakhih wa jai-jai.
