U DC ka North Garo Hills District kam chibynta wow poi cha ka thong ka sorkar wow yoh tika 100% kiwa chong chnong chwa wow poi ka Christmas yow khanglaad leh yei wan ka la-ær wa le ka khlam khamtam hadien wa da mih u jait khñiang COVID-19 wa dang thymme, da pynbna u yei lai cha ki chnong wa cha ki yung ki bru yow e tika.
Kamtæ da pyntip wa ki Doctor kamjooh ki wakreh hei chait i khiah daw lai ki na kawi ka chnong cha kawi kamjooh daw psiah na iwi i yung cha iwi yow e tika cha ki wym pu yoh kamjooh yow booddien ya ki wym pu em wan chim yei bhah wa ar i tika.
Najrong kini kiwa daw leh man-ka-sngi, daw pynman leh ya ka lai yalap wa kyrpang ha ki kattu katni ki chnong wa ha ki Polling Station ha ka 7 wa 8 tarik uni u bnai.
Da khut leh yei ya krehlang waroh ki Nokma, ki Sordar, ki VEC President/Secretary, kiwa yahkhmat niam wa ki paidbah neibynta i bha i miat wa i chngaaiñ yong waroh.
Ka North Garo Hills kamwa man kattæ hadooh ka 3 tarik kiwa da dep yoh tika chisien da em ki 52.6% iwa man 66,706 ngut kiwa da yoh tika chisien heiwa ka thong toh 1,26,818 ngut iwa mut dang em sa 60,112 ngut ki wym pu em wan chim tika hapoh ka District.
Hapoh ka jylla da em sa du ar tylli ki District wa dang em hapoh 50% kiwa da yoh tika chisien kitæ toh ha West Khasi Hills (41.9%) waka West Jaiñtia Hills (48.2%).
Ha waroh kawi ka jylla kiwa da dep yoh tika chisien da em ki 57.9%.
