Ha kani ka 2 tarik uni u bnai u State President ka National Students Union of India (NSUI), u Bansharailang Pyngrope chirup wa ki 600 ngut da mih ki na ka seiñ Congress wei ha ka 3 tarik won u Fernandes S. Dkhar uwa man u General Secretary ka Meghalaya Pradesh Youth Congress chirup wa ki 400 ngut leh da mih ki na ka seiñ.
Hajrong ini neiliang ki ar chnat ka Congress kiwa kynthup ya ka Meghalaya Pradesh Youth Congress (MPYC) chirup wa ka National Students Union of India (NSUI) ynne ka sngi da kyntiat ki wa da mih lut ki dkhot na ki seiñ yong ki.
U Banphira Basaiawmoit uwa man u President ka MPYC, East Khasi Hills District da ong u wa i yut u Fernandes Dkhar toh wow pyndur donhi neibhah wa tip che ki wa da dooh ki yei kyrdan wa kongsan hapoh ka Party Congress.
U Basaiawmoit da ong u leh wa lada u Dkhar uwa man leh kam u General Secretary warim ka MPYC uwa dang yakhun wow chah jied ya ka kyrdan President ka MPYC lada ym yoosuk u yei rukom krehkaam jied ka seiñ, da toh u ujor u cha ki bor ka Party chwa wow yut u na ka seiñ.
Da ong leh wa lada yut seiñ u deilang wa ki 400 ngut ymye u wow jop deiwa kyrchaan du na ki wow man kam u President ka MPYC deiwa pyntip wa ka MPYC dang dep pynpsiah ko hadooh 20,000 ngut ki khynroo hapoh ka jylla.
U Basaiawmoit da ong u leh wa kiwa yahkhmat ka Youth Congress ym yoh por ya ki kaam khutia mutia neibhah wa dang em kiwi ki kaam wa khia.
Heijooh i por u Basaiawmoit da kyrpaad u ya ki paidbah wa ymtoh u chah yah bakla ki ha ki kattu katni ngut donhi neibhah emkaam wow yakhun pyrchah yei dooh kreh khamtam kiwa da dep puræ Graduate wa chaneiñ kiwa da em hadooh 16%.
Da kdaw u leh wa ka Meghalaya man ko ka jylla wa san wa dooh dhooh hapoh ka ri heiwa Gross State Domestic Product (GSDP) da hiar ko u snem mang tyngka wa khaddooh.
