Ka seiñ Jaiñtia Hills Truck Owners Association (JHTOA) ynne ka sngi da sdang ko ya i yakhih yong ka iwa khlem booh por hadien wym mano ki karkhana pynmih khyndaw-bilat ya i dawa yong ka seiñ wow su ya i dor bai kit katkam wa da booh ka sorkar iwa T. 7 chi Metric Ton chi Kilometer.
Ya ini i yakhih da sdang ha Takhniang, Tuber hajan ka yung krehkaam ka seiñ heiwa ki dkhot ka seiñ da ksoh wei da pynuiñ lut ki ya ki Truck wa kit wa kiwi ki mar wa mih na ki karkhana pynmih khyndaw-bilat.
Ha kani ka sngi da pynman leh ya ka yalang wa tbian heiwa da rai wa kat wympu bait ki karkhana u su katkam i dor wa da booh, neiliang yong ki ym sangeh ki ya ini i yakhih.
U President ka seiñ, u Nidamon Chullet da kyntu u ya ki paidbah ha kylleiñ ka jylla kiwa embynta ha kani ka yakhih wow yakhih deiwa jai jai khlem pynmih iwon iwon i awri tangwa u phah uiñ donhi ya ki Truck wa mih na ki karkhana.
Hajrong ki Truck ki karkhana, u Nidamon da ong u wa ka seiñ la man katwa man leh ym pdiang ko ya kini ki Truck wow kamai ki ym du neidaw wym biang ki ya ki kot kam ki Trading License tangwa ini da ktah i yei kamai ki tre jylla kiwa em Truck.
Da kdaw u leh wa ki Truck ki karkhana toh kiwa heh wei kiwa ym yahaap wow kit u bah hapoh jylla neibhah wa ki sarok dang man ki kiwa khian wei kini ki Truck da ktah ki yei lai i wan ki paidbah neibhah boonsien em i sahkut kari toh na kini ki truck heiwa kiwa chitom em i por khlaad ki du hawa sahkut kari deiwa pynrap leh wa kini ki Truck booh ki hei maa ya ki khynnah skur wa em ha sarokbah.
Heijooh i por da pyntip u wa hajrong wa da khang ya ki kari kit mar wa mih na ki karkhana, ynne da rai leh wa nadooh mynstep ym chah de ya ki kari kit mar wow lai ki cha kini ki karkhana.
Da kyntu u leh ya ka sorkar wow man ko kawa chimkhia hajrong ini i kaam deiwa ong leh wa ka seiñ daw pynhoor ko yei yakhih ha ki sngi wow wan.
