U Montri ka sorkar jylla wa pait ya ka chnat Law, u James PK Sangma ynne da wan wai u ya District Council Court Building ha Riatsasim, Jowai kam u kongsan hei emlang u MLA ka Jowai, u Wailadmiki Shylla kam u symbood kongsan u CEM ka JHADC u Thombor Shiwat wa u DC ka West Jaiñtia Hills u Garod LSN Dykes.
Ha kani ka sngi da emlang ki Dolloi na ki Elaka waphær waphær, ki muktiar na ka West Jaiñtia Hills Bar Association wa na ka East Jaiñtia Hills Bar Association, ki MDC wa kiwi kiwi.
Ha kani ka sngi ya ka yalang da pynlai da ka E. Shylla, ka Secretary ka JHADC heiwa da yoh ya ki kyntien lamphang na ka E. Ksoo.
U EM In-charge ka CWD ka JHADC, u Phasmon Dkhar hawa e yei klam pdiang burom da ong u wa ynne ka sngi man ko kawa sahkynmoo ya ki paidbah ka thaaiñ Ri-loom Jaiñtia neibhah wa da ye u wai ya kani ka yung krehkaam ka District Council Court.
Da ong u wa da chimpor boon snem wow pyndep ya kani ka yung heiwa da sahteiñ i chna ya ka wei kam u EM wa pait ya ka chnat CWD da chimkhia u wow booddien wow sdang biang i kreh ya kani ka yung hadooh wa ye wow wai noh ya ka wow sdang biang ya ki kaam ka yung bichaar ka Council na kani ka thaw hanla em hapyrdi i duna ka poisa poilaiñ.
Da kyntu u leh ya u Montri ka sorkar jylla, u James wow e yarap cha ka Council ha ki por wow wan.
Neiliang u CEM, u Thombor Shiwat da ong u wa da sdang ya ka District Council hapoh ka Sixth Schedule ka riti synchaar ka ri heiwa da em le tylli ki rukom bichaar kiwa kynthup ya ka District Council Court, Addl. District Council Court wa ki Subordinate Court heiwa da bichaar ya ki kaam katkam ka rukom im ki paidbah ka Ri-loom Jaiñtia.
Da e khublei u ya ka sorkar India wa da e yarap poisa ko hapoh ka 13th Finance wow chna ya ka yung bichaar kamjooh leh ha ki 19 tylli ki Elaka wei dei em kini ki yung bichaar daw ye wow pynneh ya i rukom im ki paidbah.
Da kyntu u leh ya u James wow rah u ha ka sorkar wow pynlait noh ya ka bhah ka District Council na ki Major & Minor Mineral wa toh u yoh ka JHADC na ka sorkar jylla.
Neiliang u Wailadmiki Shylla da ong u wa man iwa khroo bha wa ha ka synchaar paidbah emkaam leh wow em ka yung bichaar kawa khlan deiwa e khublei ya ka District Council wa da ye ko u wanrah ya kani ka yung thymme ka District Council Court heiwa daw ye ko u pynsmat wow e bichaar ya ki mukotduma ki paidbah.
Heijooh i por da kyntu u ya u James wow pynlait noh ya ka bhah yong ka Council neibhah wa la kamwa chi snem tam ym em yoh tulop kiwa kreh ka JHADC.
Kam u kongsan ha kani ka sngi, u James PK Sangma da ong u wa ynne da man ko ka sngi wa sñiawsarong ya oo wow embynta ha kani ka yalang wow wai ya kani ka yung District Council Court.
Da e yaroh u ya u Thombor Shiwat wa hapoh i yahkhmat yong oo da ye u pyndep ya kani ka yung khamtam hapoh i yahkhmat u Phasmon Dkhar wow booddien ya ini i kaam.
U James da ong u wa ka Sixth Schedule man ko kam ka riti synchaar wa khian heiyatoh wow pynwandur ya i rukom im ki jaitbru ri-loom khlem chah ktah ha i rukom im ki jaitbru boon paaid.
Da ong u wa da sñiawkmen u wa ka District Council Court ka JHADC daw sdang pynemkaam noh ko ya ki stat ka juk wa katni namo ka Technology wei kani daw yarap bha ko ya ki paidbah wow yoh ki yei bichaar wa paka ya ki mukotduma yong ki.
Heiyatoh wa ka bhah poisa ka Council, da kular u wa kini ki kaam wa dang sahteiñ ha ka sorkar, neiliang yong ki dang yaleh ki wow kreh yeini hadooh kattæ wei da kyrmen u wa chwa ka Christmas daw ye u e noh ya ka bhah wa dang sah.
Kiwi kiwa da klam ha kani ka sngi toh u Garod LSN Dykes katwa ka V Kyndiah kawa man kam ka Addl Judge ka District Council Court da e ko yei kyntien e khublei.
