U President ka Khasi Students’ Union, u Lambokstarwell Marngar da ong u wa ka sorkar India da toh wow pyndam noh ko ya ka Armed Forces Special Powers Act (AFSPA), 1958 wei wow pynkrehkaam noh ya ka ILP wei da dawa leh wow pyndam noh ya ka Citizenship Amendment Act (CAA) na ka thaaiñ mihsngi waroh kawi neibhah wa ki paidbah ym emkaam ki ya ka CAA wa ka AFSPA tangwa da emkaam ki ya ka ILP.
Ka North East Students’ Organisation (NESO) ynne ka sngi da pynman ko ya ka yakhih kyllaiñ myngngor hakhmat u Mot u Woh Kiang Nangbah ha Shillong wow beiñ ya ki kaam damok ki chipai kiwa da siat yap ya kiwa chong chnong ka Oting, Mon District kawa em ha Nagaland.
Uni u heh ka KSU da beiñ joor u leh ya ki MP hajrong i suki yong ki hajrong i jia ha Nagaland, deiwa ong wa du deiwa booh Poster ha Khyndailad da sdang awri ki MP katwa i chah siat yap hadooh 12-14 ngut ki bru na Nagalang won ym em wa mano wot uwi leh ki wow ujor pyrchah ya ki chipai ka sorkar India.
Chooh chooh da ong u wa ini i yachem ki jaitbru na ka thaaiñ mihsngi ym mut i dur wow sñiawlem ya ki paidbah ka Nagaland tangwa wow pynyoo cha ka sorkar India ya iyi iwa da leh neipor cheipor neibhah iwa jia ha ka 4 tarik ha Nagaland ymtoh iwa nyngkong tangwa iwa da jia dei langær ha kylleiñ ka thaaiñ.
