Kam chibynta i lehkmen ya ka sngi da wa jied da ka United Nations General Assembly hapoh ka Universal Declaration of Human Rights (UDHR) ha 1948, da pynman ya ka International Human Rights Day 2021 ynnin ka sngi ha ka State Convention Center, Shillong.
Neiliang u Chief Justice ka High Court ka Meghalaya, u Justice Sanjib Banerjee da wan u wow embynta kam u kongsan.
Ya kani ka yalang da pynman da ka Meghalaya Human Right Commission hajrong ka phang “Equality-Reducing Inequalities, Advancing Human Rights”
Hawa e yei klam, u Justice Sanjib Banerjee da ban joor u yei emkaam wow yada yei boon ki jaitbru wa em hapoh ka ri India. Da pynsñiawsih u leh yei sñiawsih wa em ka Caste System wa i ban beiñ ya ki kynthai iwa man leh iwa dang sakhiat hadooh ynne ka sngi, da ong u leh wa ini toh i hiar pateiñ nadooh i por wa synchaar ki pharæng iwa man i rukom wa da toh u kut noh wei ym toh u sñiawsarong yeini.
Da beiñ u leh yei pynmyllien ya ka VIP Culture iwa pynphær kyrdan ya ki bru hapyrdi wa em hei bor wa ki bru paidbah, nadooh i rukom im wa ki kabu wa yoh ki. Da ong u leh wa man iwa sepai wow pyndooh ya iwa rim lada mih salan da ka VIP Culture wow pynku kyrdan ya kitu kiwa em hei bor iwa da wanrah yei noh chiliang hapoh ka imlang sahlang.
Da kdaw u leh wa hanla ka ri India katni da em ko iwa boon iwa bha wa yahaap waka juk wa katni tangwa i yap thngan, i dooh i duk, i ym biang thaw sah wa i yoh sumaar da iwa biang- ym em da pait da yaklam bha yeini.
Da ong u leh i hok longbru manbru toh iwa em hapyrdi dooh yow yoh yei suk i saaiñ wa i roi i paar, wei i pynbiang ya ka synchaar khadar ym mut wa daw pynyoh yei hok manbru longbru nadooh i khih i khan, i ya ryngkat ha ka imlang sahlang waka dustur riti kiwa waroh toh kiwa emkaam. Ka chnat bichaar leh toh kawa emkaam bha wow yada yei hok wei burom yong u bru, da pynrap u.
