U Montri Rangbah ka jylla, u Conrad K Sangma ynne ka sngi da lai booh mooyurim u ya ka Inspection & Certification Centre ha Sawlad, Shillong deiwa emlang u Montri ka chnat, Transport, u Dasakhiat Lamare, ka Chief Secretary, Rebecca Suchiang wa u Commissioner & Secretary, Transport, u M R Synrem.
Hawa e yei klam, u Conrad K Sangma da ong u wa ka jylla daw yoo ko yeiwa boon ki kari ha ki snem wow wan kamtæ da emkaam wow em ka thaw wow sylli yei chait i khiah ki kari namo ka Inspection wa Certification Centre ha Shillong. Chooh chooh da ong u wa kani ka Automated Inspection and Certification Center daw pynduna ko yei por wa pynlut u leh Fitness Testing ki kari kamjooh wow pynmiat leh yei rukom sylli namo i Inspection.
Da ong u leh wa i pait yei bha i miat ki kari toh iwa emkaam yow tip kiwon kiwa dang miat wow lai ha ki sarok yow lait nei mynsoo wa ki tyrrah kari kamjooh leh yow pynduna yei tdem wa mih na ki kari. Da pyntip u leh wa ka sorkar daw wai chooh chooh ko ya kam kini ki Testing Center ha kylleiñ ka jylla.
U Montri Rangbah da e khublei u leh ya ka sorkar India, Ministry of Road & Highways wa yarap poisa ki nadong chadong wow chna ya kani ka Center. Da kyntu u leh ya ka chnat Transport wow pyndep smat yeni i kreh.
Hachwa ini, u Commissioner & Secretary, Transport, u M R Synrem da pyntip u wa kani ka kreh toh kawa pyndap poisa da ka chnat Ministry of Road & Highways, ka sorkar India, wei da yooluti wow pyndep ka hapoh 10 bnai. Da klam u leh yei emkaam wow paitbha ya ki kari neibhah ini man ko i myntoi iwa ye u yoh deiwa phah pait ya ki kari ha kani ka Center.
