E yarap poisa u Conrad cha ki warep chyrmit Lakadong

U Montri Rangbah ka jylla, u Conrad K Sangma ynne da ekti u ya ki Cheque cha ki warep sy’iñ chyrmit Lakadong ha ka yalang wow e yarap poisa cha ki Collective Marketing Centres (CMCs) wa ki Processing Units hapoh ka Mission Lakadong ha Meghalaya Agriculture & Management Extension Training Institute (MAMETI) Upper Shillong heiwa da emlang leh u Montri ki kaam rep u Banteidor Lyngdoh.

Neiliang u Conrad K Sangma hawa e yei klam cha ki warep chirmit wa wan na Ri-loom Jaiñtia da ong u wa ha ki snem wa dadep ki bru na Ri-loom Jaiñtia toh kiwa khih mooyong wei emkaam u thoohlaad ya ki da kiwi ki jait kreh ki wym ktah ya ka rymaw. 

Da ong u wa ka sorkar da yaleh ko wow pynku ya ki seiñ na tre dooh wa em ha ki chnong ha ki bynta kiwa boon wei da e yarap leh ya ki warep T. 5 klur wei daw saam ya kani cha ki 16 tylli ki CMCs wei da ekti ar tylli ki Processing Units heiwa T. 20 lak daw e kam ka Grant wow chna ya ki yung krehkaam wei T. 10 lak won wow kyrchaan ya ki kreh wei wow sdang kreh. 

Da pyntip u leh wa daw chna ya ki ar tylli ki Curcumin Extraction Unit kiwa mar T. 10 klur neibhah kam kani ka thaw wa jan dooh em ko ha Bangalore katwa kamtæ emkaam u chna noh ya ki hapoh ka jylla deiwa kyntu ya kiwa seiñ kreh wow embynta ki ha ka Lakadong Mission.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Heijooh i por da pyntip u wa ki Organic Certification Centre wa ki Testing Laboratories emkaam bha u yoh ya ki chwa wow chalan ya u chyrmit Lakadong cha kiwi ki ri wei daw chna noh ya ki hapoh ka jylla. Da pynbna u wa ha u Thohlakhmi (Feb) 2022 heipor wa wai waroh ki CMC daw pynman leh ya ka Lakadong Festival yow pynlai yaaw ya uni u chyrmit wa kyrpang na ka jylla. 

Chooh chooh da ong u wa ki Logistic Centre ha Umroi wa Jengjal Airport da jan pyndep ya ki wei kini ki thaw daw yarap ko ya ki warep ka jylla hei wow kit u bah ya ki mar yong ki. 

Ha kani ka sngi da yoh ya ki kyntien waiphang na u Commissioner & Secretary, Agriculture, u Dr. Vijay Kumar uwa da ong wa ki CMC daw yarap ki ya ki warep nadooh ki thaw pynlang, ki kor tylliat wa kiwi kiwi. 

Kiwi kiwa da klam toh u K N Kumar, Chairman, Meghalaya Farmers Empowerment Commission, A. Suting, Chief Operating Officer, Livelihood Improvement Finance Company of Meghalaya (LIFCOM) heiwa ki warep sy’iñ chyrmit Lakadong da khana ki yeiwa chem ki.