Ka seiñ ki wakreh ka MeECL kawa tip kam ka Coordination Committee of Registered MeECL (Employees) Associations And Unions (CCORMAU) da thoh ko cha u Montri Rangbah ka jylla, u Conrad Sangma heiyatoh wa ka Terminal Benefits kawa toh u su lyngba ka Corpus Fund kawa T. 840 klur iwa mut ka poisa kawa toh u em yow su cha kiwa da chong ngiah kam ka Pension wa kiwi de wa toh u yoh myntoi ki.
Ka seiñ da pynkynmoo ko ya ka yalang wa da pynman ha ka 12-02-20 heiwa da tyrwa wa ka sorkar toh u booh ko poisa neibynta ka Corpus Fund ka wow pynemkaam neibynta i emkaam ka MeECL tangwa hadooh katni ym em booh poisa hapoh ka Corpus Fund.
Kamtæ ka MeECL da hap ko wow kit hei tympha yong ka hi yow pynlut ya iwa boon i emkaam hadooh i su ya ka Pension iwa da ktah joor ya ka Corporation kawa da chitom poisa chwa.
Deiwa kheiñ yei dooh yei sut nadooh wa sdang, wei lada toh wa em ka poisa Corpus Fund, katni da toh u poi ko haddooh T. 1800-2000 klur.
Ka seiñ da kdaw ko leh wa nadooh u 2016 kiwa da lai Pension ym em yoh ki ya ka Gratuity, ka LEB wa kiwi kiwi iwa da man leh pyrchah ya ka aiñ wei da man leh kamwa pynchitom ya kitu kiwa da chong-ngiah.
Chooh chooh da ong wa sñiawthooh hi wa wow phah poisa waroh chisien phah cha ka Corpus Fund toh iwa eh, kamtæ da kyrpaad ya ka sorkar wa ha u snem mang poisa 2022-23 wow pynlait kajiak chisien iwa T. 20 klur chi bnai nadooh u Naitung (Apr) 2022. Wei da kani daw yarap wow pynsuk ya kiwa da lai Pension kamjooh leh kiwi ki wakreh.
Kam wow pynkynmoo wa heipor wa pynman ya ka MeSEB kam ka Corporation yow pynkha ya ka MeECL ha u snem 2010 da toh wow booh ya ka Corpus Fund namo ka poisa wow booh charood yow pynlang kawa toh u man T. 840 klur heiwa na kani toh u su ya ka tulop, ki Gratuity Fund wa kiwi kawa man leh neibynta kiwa da lai Pension tangwa ka sorkar ym em booh ko ya kani ka poisa.
