Ynne ka sngi u Montri Rangbah ka jylla, u Conrad K Sangma da wan booh u ya u mooyurim wa pura yong ka Wapung C&RD Block ya kawa da kyrriah na Khliehriat hei emlang u Montri ka chnat C&RD Block, u Hamletson Dohling, u Montri ka chnat Revenue uwa man leh u MLA ka thaaiñ u Kyrmen Shylla.
Ha kani ka sngi da yoh ya i kyntien pdiang burom na u DC ka East Jaiñtia u SS Syiemlieh.
Neiliang u waheh chnong hawa e yei klam da khana u ya i chah thok chah chukor ki paidbah ka thaaiñ heiwa da booh mooyurim ya ka nyngkong ha u 2017 tangwa da rah wot ya ka cha kiwi ki thaw heiwa da kyrmen u wa ha kani ka kynti daw neh pura ko ha kani ka chnong.
U Kyrmen Shylla hawa e yei klam da e khublei u ya u Conrad wa u Hamletson wa da pyntikna ki wa ini i kaam da man i iwa sakhiat heiwa da ye u wanrah biang ya kani ka thaw cha Wapung. Da ong u wa neiliang yong oo ym em u chong kli-kti u wei da booddien u ya ini i kaam hadooh wa poi ynne ka sngi.
U Hamletson Dohling hawa e yei klam da ong u wa ynne da wan wow pynskem ya kani ka Block ha Wapungskur heiwa ki paidbah ymtoh u artatien ki hajrong ini i kaam neibhah ka yung krehkaam ymtoh wow kyrriah ma kyrriah ya ka.
Da ong u wa kani ka sorkar toh kawa ap ya ki paidbah waroh heiwa ya ini i kaam da chong bichaar bha wei ki paidbah ka thaaiñ Lumchnong leh ymtoh u sñiawsih ki deiwa pynrap wa ka sorkar daw chong pyrkhat biang ko lada emkaam wow pynmih chooh ya ki Block Office.
Chooh chooh da pyntip u wa ya kani ka yung krehkaam heini daw chna ha i lut wa T. 3 Klur.
U Conrad Sangma hawa e yei klam da ong u wa le snem chiteiñ wa da em kani ka sorkar da kreh ko hei wow pynkylla pynmiat ya i rukom im ki paidbah heiwa ka sorkar da booh ko ha khlieh dooh ya ki paidbah.
Da ong u wa em chiboon i eh i khoo wa chem ki paidbah wei hanla wan ka khlam COVID-19 kattæ leh da ye wow pynkylla kajiak heiwa hei samen da hun u yeini khamtam ynne ka sngi.
Chooh chooh da ong u wa ka sorkar daw pyrkhat ko heiwon u pynmih chooh ya ki C&RD Block neibhah em ki thaw kiwa ki bru hap lai ki 50-60 Km wow poi cha kini ki yung krehkaam.
Heijooh i por da ong u wa ya kani ka Block heini da ye wow wanrah toh nei booddien u MLA ka thaaiñ kamjooh leh ki MDC wa kiwi kiwi.
Da ong u wa kani toh ka sien wa nyngkong wa ki skur, ki thanat, ki yung krehkaam sorkar wa kiwi kiwi da yoh ki ya ka poisa wow chna pynmiat ya ki kamjooh leh wow chna ya ki yung thymme wei ini toh nei kreh chitom ka sorkar jylla.
Ha kani ka sngi da yoh leh i klam na u T. Lyngwa u Secretary ka chnat C&RD, u MDC ka JHADC u Phasmon Dkhar wei da pynkut ya ka yalang da ki kyntien khublei na u MDC ka thaaiñ, u Lasky Rymbai.
Puræ leh: Hapyrdi u slap wa joor wai u Sñiawbhalang ya u Moo-yurim ka Wapung Block
