Ka sorkar Meghalaya lyngba ka chnat Home (Political) da pynmih kyndon ko heiyatoh wa i lehkmen Christmas wa u snem thymme kiwa hap wow bood da kiwa pynman yalang wa kamjooh kiwa chimbynta.
Ya kiwa da em 65 snem, kiwa da em chwa i chitom, ki kynthai wa punkhon wa ki khynnah da sneiñ ya ki wow neh ki ha yung. Tangwa kitu kiwa da dep yoh yei tika waroh arsien ye ki wow chimbynta ha i lehkmen. Wei deiwa pyrkhat yei bha i miat yong waroh, kiwa chimbynta toh u man kiwa da dep chimtika ym duna ya chisien heiwa kiwa pynman ya ki yalang toh u pynbna ki yeini.
Hap leh wow bood ya ki kyndon wa da pynbna nadooh nachwa yow yada deiwa yajngai 5 ft uwi ya uwi, u deiñ ya ki Mask wa ar rtap khlem pep, wow lehkhooid ya ki kti, ym toh wow mynthu ha ki thaw paidbah wa kiwi kiwi de.
Hawa pynman yaseiñ hawa toh waka Christmas wa u snem thymme toh u bood ya ki kyndon wa da pynmih da ka chna Home (Political) ha ka 13-08-21 wa haka 26-11-21.
Toh u yabhah leh yei por wa pynman yaseiñ. Chah hi leh wow pynman yaseiñ hapoh u pood u ang ka yungmane dei wym toh u embru palat 75%.
Chah hi wow lai Christmas Carol deiwa bood ya ki kyndon.
Heiyatoh wa i baamdoh yong chnong hap leh wow bood thij ya ki kyndon. Ki Balang hap ki wow booh dei por ya kiwa wan cha ka baamdoh.
Daw pyndam ya ka Night Curfew ha ka 24, 25 wa 31 tarik uni u bnai yow ye ki bru wow lai cha ki yaseiñ pyrdi synyaw.
Ya waroh ki kaam/yalang wa yatoh wa ka Christmas wa u snem thymme hap wow paan bor chwa na ki jar jiar ki DC katkam ki kyndon wa da pynmih da ka Home (Political) Department lyngba ka hukum POL.75/2020/pt.1/115, kawa em tarik 26-11-21.
