Ka Jaintia Career Coaching Centre kawa man kawi ka thaw e sikai (Coaching Class) ya ki khynroo khyllood thooh khih thooh kreh heiyatoh wa ki Competitive Exam kam ka DSC, SSC, MTET wa kiwi ki jait Exam, da wai paidbah ya ka ha kani ka 18 tarik u Kmaichonglad kawa em mar pyrchah waka yung krehkaam u DTO, Jowai.
Ha kani ka sngi da emlang leh u A. Andrew Shullai, MDC ka JHADC kam u kongsan uwa da chim leh yaka bynta wow wai paidbah ya kani ka thaw e sikai.
Yaka yalang da pynlai da u Chairman ka JCCC, u B. Samayang wei da yoh i klam pdiang na u Asst. Secretary ka JCCC u D. Phawa.
U T. Shangpliang uwa sikai ka Marian Hill Higher Secondary School hawa e yei klam ong u wa kam kani ka thaw e sikai man iwa emkaam hadooh kattæ kattæ yow myntoi kiwa thooh khih thooh kreh hawa pynkhreh yaki Exam waphær waphær.
Neiliang u kongsan u A. Andrew Shullai won ong u wa da toh i por wow em kam kani ka Centre neibhah dang duna bha i tip i chemphang heiyatoh kam kini ki laiñ. Kamtæ kyntu u ya kiwa pynlai kani ka thaw e sikai wow kreh chitom bha ki khnang yow ye ki u pynmih yaki sahep, kiwa kreh sorkar haki kyrdan waphær waphær lyngba kani ka Coaching Centre.
Ha kani ka yalang da em leh i e khusnaam ya kiwa wan leh Coaching ha kani ka thaw neibynta ka MTET Exam-2021, wa kynthup yaka Habaiamon Shylla, ka Junita Lapasam, ka F. Larisa Bhaki Passah, ka Tyngshainbha Lapasam waka Imonhi Lamare.
Da pynkut yaka yalang da ki kyntein e khulblei na ka V. Langstang kawa man kawa e buit kani ka Centre.
