Ka jylla Manipur da yoh ko ya uwa nyngkong dooh uwa yoh ya u Omicron wa da chem ha uwi u bru uwa dang liwan na ka ri Tanzania wa em ha Africa. Wei uni da man u leh uwa nyngkong wa yoh Omicron ha ka thaaiñ mihsngi ka jylla.
Uni u bru toh uwa 48 snem i rta uwa na Imphal West, da chem wa yoh u ya uni u jait khñiang thymme u COVID-19 hadien wa Test ya oo ha ka 21 tarik uni u bnai. Ya uni uwa chah ktah da sumaar ya oo hapoh ka JNIMS Hospital, Imphal.
Ya ka nongmuna (Sample) uwa yoh Omicron da phah leh ya ka Genome Sequencing ha IBSD Takyelpal, Imphal.
Da em leh sa 3 ngut kiwa hayung hasem u kiwa da yoh COVID-19.
Ha Manipur da em 462 ngut ki bru wa da wan na baar ri kiwa dang booddien ka chnat i chait i khiah wei da Test ya ki da ka RT-PCR ha ka sngi wa 8 hadien wa poi biang ki chapoh India. Wei na kini da em 155 ngut kiwa da pyndep yei chongkset wa 14 sngi hadooh ka 24 tarik uni u bnai katwa ya ki 113 ngut kiwa dang sah dang phah chongkset ki wei manda dep 8 sngi wei hadien wa Test lada chem toh kiwa yoh COVID-19 daw phah leh ya ka Genome Sequencing.
