Ka Kiang Nangbah Iasiat Khnam Memorial Society (KNIKMS) Jowai chirup i yakrehlang wa ka yung krehkaam u Deputy Commissioner West Jaintia Hills ha ka sngi Hat 29 Kmaichonglad da pynman ki ya ka yakob leh Drama wa tbian chaphang ki khlawait wa chlur yong ka ri India kiwa kynthup yow Kiang Nangbah wa kiwi khlawait yong ki jaitbru waphær wei ya kani ka yakob da pynman ha yungwalieh ka Dorbar Chnong Loompyrdi Iongpiah.
Ha ka yalang wa tbian yong kani ka yakob hei pynlai u Jaitda-O Sumer da em i ngoohblai ngoohsyiem da u Barleemore Shylla, dkhot ka KNIMS neitæ pynbood ki kyntien yahkhmat hajrong ka thong yong kani ka yalang wa da pynsñiaw da u Pearlet Toi, President KNIKMS neitæ ki kyntien e mynsien ya kiwa ya chimbynta kamjooh ya ka seiñ na u kongsan yong kani ka janmiet u Saron Paswet, Executive Member JHADC katwa hawakut wan u Dayooki Sumer, Assistant Secretary KIKMS da pachat u ki kyntien khublei.
Ha kani ka yakob da wan ya chimbynta da ki san tylli ki dhab wa kynthup ya ka Chilliangraij, Loompyrdi Iongpiah, ka Lamlyer na Shangpung, Phiwaiahluti na Raliang wa ka HPJ Group na Panaliar.
Le tylli ki dhab wa yachimbynta ha kani ka yakop da pynyoo da khana ki chaphang i parom u Kiang Nangbah katwa ka Lamlyer na Shangpung da leh ki chaphang i parom u Kiri Dolloi wa ka HPJ na Panaliar wan da leh ki yei parom yong ka Begum Hazrat Mahal kawi na ki kynthai wa yieñ nyngkong wow yaleh pyrchah ya ki bor ka sorkar pharæng ha u snem 1857.
Ya kani ka yakob da pait da bichaar da ki le ngut ki bru chemphang ha ki kaam yalehke Drama wei hadien i sylli bniah yong ki da pynsabut wa ka Loompyrdi Iongpiah man ko kawi na ki dhab wa yoh yei naam jop.
