I sahkut kari ha u sarok na Jowai cha Shillong wa da sdang nadooh ynnin i janmiet ka 30 tarik da man i iwa joor bha iwa da lait hadooh ynne i step hadooh wa da em wa pynyieñ da ka Tent hapyrdi sarok yow yoh u thiah dei suk.
Kiwa lai Shillong kamjooh leh kiwa wan cha Jowai da chimpor ki hadooh 8-9 kynta hadien wa sdang i sahkut kari nadooh na Mawryngkneng tymbud hadooh wa poi ha Mookyndur.
Da em leh kiwa da haap wow sahmiet ha luti neidaw wym lait de ki kari wow lai.
Katkam ka yutip wa yoh na ki pulit da ong wa ini i sahkut kari ha u sarok toh neidaw wa em ki truck wa sih ha ki ar le thaw yong u sarok khamtam ha Puriang.
Da pyntip leh wa ynne i sngi da sdang lait ki kari u lai na waroh ar liang u sarok.
Kiwa yaklam wa u Wyrta da ong ki wa da sahkut ki nadooh i por 7:30 i miet manda poi ki ha riat Mawryngkneng wei da em leh uwi uwa da sai da ka Tent wa da booh hakhmat kari yow thiah neidaw wa da sahkut da boon boon kynta.
Uwi won uwa poi Jowai da khana u da chimpor 8 kynta yow poi Jowai na Shillong.
