Ka sorkar Nagaland da pynkrehkaam ko ya ki kyndon yada COVID-19 hadien wa da ku kiwa yabi ya uni u khñiang ha kiwi ki jylla hanla ka Nagaland dang man hi ko kawa lait na ka la-ær wa le ka khlam deiwa em 81 ngut kiwa dang chah ktah wa 6 ngut kiwa dang yoh ynne ka sngi.
Katkam ki kyndon, waroh nadooh kiwa em 12 snem chaneiñ kiwa psiah chapoh ka Nagaland wa kynthup leh ya kitu kiwa da dep yoh pura yei tika hap ki wow wanrah lang ya ka Negative COVID-19 Test Report wa da leh da ka RT-PCR, TrueNat lane CBNAAT kiwa toh u leh hapoh 3 sngi chwa wow poi chapoh ka jylla.
Kitu ki wym em ya ka Negative COVID-19 Test Report, kiwa em ya ka Negative Certificate tangwa em ki ya ki dak ki chin wa chitom hap ki wow leh ya ka COVID-19 Test deiwa su yei dor wa da booh da ka sorkar wei hap ki wow leh ya ka Quarantine hadooh wa yoh ya ka Result.
Kini ki kyndon toh kiwa krehkaam nadooh ka 10 tarik uni u bnai.
Waroh ki yalang paidbah hap wow pynduna yei embru da 50% lane deiwa em hapoh 200 ngut ki bru.
Da pynkrehkaam leh ya ka Night Curfew nadooh 9:00 waje i miet hadooh 5:00 waje i step.
Ha Sikkim leh nadooh ka 10 tarik uni u bnai waroh kiwa psiah chapoh ka jylla hap ki wow wanrah ya ka Negative RT-PCR Report kawa da leh hapoh 72 kynta chwa wow psiah chapoh ka jylla. Neiliang ka sorkar leh daw Test ko da ka Rapid Antigen Test ha waroh ki Check Post wa ha ka Pakyong Airport.
Da phah leh ya ki kari wow bood da ka Odd/Even katkam ka tarik (Odd Number/Even Number). Tangwa ini ym krehkaam ko ya ki kari wa kit mar, ki kari chipai, ki kari sorkar wa kitu kiwa leh ya ki kaam wym hoi u dam. Da pynlait leh ya ki Luxury Taxi kiwa da yoh yei tipmit na kani ka kyndon.
Ha ki thaw paidbah kam ki Pub, Discotheque wa kiwi ki thaw pynwyrngia u chah wow em ki bru 50% donhi kamjooh leh ha ki thaw baam.
Ki Hotel, ki Home Stay wa ki Guest House u chah wow krehkaam ki 50% na iwa ye ki.
