Ka yung krehkaam ka Deputy Commissioner, East Khasi Hills District daw pynman ko ya ka Mega Camp hapoh ki Polling Station yong ka Mawkynrew wa Nongkrem Assembly Constituency ha ka 11 wa 12 tarik uni u bnai yow e dawai tika yada COVID-19 wei wow thap pyrtuid ya kiwa kreh mylla hapoh ka e-Shram wa i chondur Aadhaar yow pynyabi ya u Aadhaar Card waka Card Ration.
Hawa yatoh wa i e tika hapoh kitai ki Polling Station, da kyntu ya ki paidbah waroh wow chimkhia hajrong ini i bynta wow lai chim yei tika ha kitai ki sngi wa da kdaw haneiñ khamtam dooh neibynta u khñiang thymme uwa ka WHO da e pyrtuid ko kam u Omicron yow ye u yada ya ka imlang sahlang.
Ka DC da ong wa deiwa chim yei tika hanla dang yoh ya u khñiang tangwa daw ye u pynlait nei chah thiah Hospital wei wow lait nei yap.
Kamtæ da pynchlur ya ki paidbah yong ka Mawkynrew wa Nongkrem Assembly Constituency wow lai chim ki yei tika wa da pynbait hapoh ki Polling Station yong ki ha ka 11 wa 12 tarik uni u bnai wei ym toh wow pynsepai ya kani ka kabu waka sorkar da leh ko neibynta i bha i miat yong waroh.
Kam wow pynkynmoo wa ya ini i jooh da dep wow leh ha Mawrynkneng wa Mawphlang Constituency ha ka 15 wa 16 tarik u Kmaichonglad (Dec), 2021.
Da pyntip leh wa ha ka yalang ka District Task Force Committee & COVID Vaccination ka East Khasi Hills da rai leh wow daiñ kuna ya kitu ki wym deiñ Mask.