U Montri Rangbah ka jylla, u Conrad Kongal Sangma da ong u wa ka sorkar ympu chim ko ya ka rai heiyatoh wa i khangsbak (Lockdown) deiwa pynrap wa ka sorkar ym kwah wow pynkrehkaam ya i khangsbak wow lait na i chah ktah ki paidbah, tangwa da ong u leh wa lada i man i long wanrah i chei maa, ka sorkar ym yohsa ko wow chim ya i rai.
Da ong u wa sorkar da pait bha ko ya i man i long ha ka jylla na u COVID-19 heiwa da ong u wa em i ku kiwa chah ktah, tangwa ka sorkar da pait bniah ko ya i em kiwa chah sumaar ha ki Hospital wa ki ICU.
U Montri Rangbah da ong u wa kamwa man katni ka sorkar dang ye ko u khoom ya i chah ktah ha u COVID-19, lada na u Omicron næ u Delta wei hadooh katni duna bha kiwa chah sumaar ha ki Hospital lada nujor wa u snem wa dadep wei ki pyllong leh dang pahooh ki.
Heijooh i por da kyntu joor u ya waroh wow chim ya ki laad yada kam i tika wei wow bood ya ki kyndon yada na uni u khñiang.
Heiyatoh wa i chim tika biang ya kiwa da palat 60 snem, wa kiwa kreh haphrang dooh wow yada COVID-19, u Conrad da pyntip u wa kiwa boon ki bru da wan ki chaphrang wei kiwa dadep chim tika wa nyngkong (First Dose) da poi ki hadooh 70%.
