Kam chibynta wow sdang e sikai ya kiwa chah jied hapoh ka Meghalaya Legislative Research Fellowship (MLRF) deiwa ya krehlang ka sorkar jylla waka Indian School of Business (ISB) wow wanrah ya ki thong krehkaam ka sorkar namo ki Policy kiwa deiwa thooh bniah chwa chwa wow pynkrehkaam hapoh ka jylla Meghalaya.
Ynne da sdang ya ka e sikai wa 5 sngi kawa man leh kawa nyngkong dooh kam kani ka jait wa da leh hapoh ka thaaiñ North East India heiwa da khut ya kiwa kwah wow leh ya ini ha u Naikhynde 2021.
I e sikai kynthup ki chaphang ka Political Science, Public Policy, Public Administration, International Affairs kamjooh kammon wow leh yei thooh bniah wei daw pynman leh ya ki Workshop wa boon ha kini ki 2 snem wa krehkaam ka Fellowship, da pyntip ka Dr. Aarushi Jain, Associate Director, Bharti Institute of Public Policy. Hadien ka tayaw wa nyngkong kini kiwa da chah jied daw sdang ki wow yaklam wa kiwa boon wa emkti ha ini i kaam wei daw hap ki wow pyntip iyi wa da leh ki wei kiwa da poi thong man-ka-tayaw i wow booddien daka ISB, da ong chooh chooh ko.
Ha kani ka sngi da pynman ya yalang wow sdang ha Meghalaya Administrative Training Institute, deiwa emlang u Sampath Kumar, IAS, Principal Secretary ka sorkar Meghalaya wa Director General, Meghalaya Institute of Governance (ka chnat wa pynkrehkaam ya ka MLRF), deiwa em u Project Leads, u Aiban Swer wa u Stephen Anurag P, kiwa da ong wa kani man ko wow wailaad yei rukom synchaar khadar deiwa thooh bniah deiwa em yukheiñ kamjooh leh ka laad yoh kreh ya ki khynroo ka jylla wow embynta ki wow chna Policy ya ka sorkar.
Hapoh ka MLRF, kini kiwa chah jied wa tip kam ki Fellows daw ya krehlang ki wa ki MLA wa da jied yow yarap ki wei wow e ya ki buit kiwa da dep thooh bniah.
