Ka seiñ Khooid Ya Ka Wah Myntdu kawa da seiñ hajrong ka yurim u thooh ki laad ki luti neibynta u yada ya ka Wah Myntdu kawa psa umbaam umdih ya ka chnong Jowai, hadien i lai luti yong ka seiñ da ki boon bnai wow yakhun pyrchah nei chahktah yong kani ka wah, kamtæ ynne ka sngi da pynman noh ko sa lai paidbah namo ka Rally ha kylleiñ ki dong ka chnong Jowai kamjooh i pynsñiawthooh paidbah hajrong i emkaam u khyrngiat yongbru noh.
U President ka KYWM u K. L. Pariat ong u i daw wa pynman wow mih madan næ mih paidbah ha kani ka kynti toh neibhah wa da boon ki ujor wa da ujor cha ki bor sorkar hajrong i chah ktah ka wah Myntdu leh wym em iwon iwon i dak i chin wada chimkhia neibynta u e yada, kamtæ wym banse de ki u paan i bor na u paidbah wa iyi wa emkaam u leh neini chakhmat khnang wa ka Myntdu wym kylla ko kam ka wah Umkhrah.
Ya ka Rally da sdang na madan Mihmyntdu deiwa lai ter ter u surok chadooh cha Iawmusiang, Mission Compound, Iongpiah, Dulong, Panaliar, Chilliangraij, Khimusniang wei pynkut won ha madan Jrisaleiñ, Chutwakhu deiwa rah lang ki Placard wa kyntu ya ki paidbah u pynkylla noh yei rukom im, neibhah wym ye u leh iyi iyi khlem ka um kamtæ toh u yada ya ka wah neibynta ka pateiñ wow wan.
U Rev. Dr. H.H. Mohrmen hawa pachat yumut ong u wa neini chakhmat emkaam u em ki kynja Workshop wa kyrpang hajrong kammon u lai chakhmat neibynta u pynneh pynsah ya kani ka wah.
Neiliang u O.R Challam da kyntu u ya kiwa yahkhmat kani ka kynhun wow lai booddien ya ki kot ki sla (File) nadooh u snem 2010 naka District Administration khnang yow tip iyi wada yaklam næ rai haka yalang wada pynman ha Conference Hall u DC ha utai u snem heiyatoh u yada ya ka wah Myntdu.
Heijooh i por leh kyntu u wow booddien yei klam u PCCF ka chnat Forest yong ka sorkar jylla ha u snem 2019 deiwa ong wa ka sorkar lyngba ka River Rejuvenation Committee da booh thong ko wow pynim ya ka wah Umkhrah, ka wah Myntdu wa ka wah Lukha tangwa hadooh katni wym em yoo iwon iwon i dak i chin.
U O.R. Challam khana u wa yeini i kyntien u PCCF da klam u ha ka 23-10-19 heipor wa wan u ha Jowai wow lehburom ya 19 ngut ki bru wa da e yada ya ki mrad.
Waroh kiwa e yei klam ha kani ka sngi da yaroh ki ya kani ka kynhun wada chim ko ya kani ka yurim wa emkaam tam neibynta i bha i miat ka imlang sahlang, heiwa u Rev. E.R. Tongper ong u wa hawa em i bahkhlieh toh u em leh i mynsien wow pyndep smat smat yeiwa emkaam.
Katwa ka H. Lato, DFO ka Jaiñtia Hills ong ko wa ka nongmuna wa khian tam toh u sdang na samen samen, itæ toh u pynduna i pynemkaam Plastic najrong wow kyruiñdien biang cha ki por nachwa heiyatoh u wanrah yei khooid i jngiar.
Ha kani ka Rally da kyrchaan lang da ki seiñbhalang waphær waphær, ka Synjuk Waheh Chnong Ri-loom Jaiñtia, ka Synjuk Waheh Chnong Jowai, ki khynroo khyllood wa ki kynhun waphær waphær.
Em napyrdi ki bru paawkhmat wym yoh u embynta lang leh da phah ki ka khubor e mynsien yong ki cha ka Khooid Ya Ka Wah Myntdu wa kynthup ka khubor wada phah da u DC ka West Jaiñtia Hills u Garod LSN Dykes, ka DC yong ka East Khasi Hills, ka Isawandan Laloo wa kiwi.
