Uwa kreh kam u Enforcement Inspector ka GHADC u Dibakar Koch, da e FIR u ynne ka sngi deiwa pynbaad wa baam poisa u Superintendent of Trade & Licensing, Taxation ka GHADC uwa tip kam u Damien K. Sangma hadien wa pynpoor yei Video ha ki Social Media wa riñ u Dibakar Koch hi ha kamra kreh u Damien K. Sangma wa em ki bynta wa e poisa u Dibakar ya u Damien. Neiliang u Dibakar da pynche u leh yeiwa mih khubor ha ka 6 tarik uni u bnai wa ini iwa mih hapoh i Video toh iwa leh kyndeh wei wa su u ya ka ram wa chim u na u Damien. Deiwa ong leh wa ym em yaklam u wa kiwon kiwon kiwa thoh khubor.
U Dibakar da ong u wa heiyatoh wa ini i mih khubor da ujor FIR u pyrchah ya u Damien K. Sangma wa ya payu yong oo u Cosmos Sangma hajrong i baam poisa wei wa da maham ki leh ya oo.
U Dibakar uwa pait ya ka Mahendraganj, South West Garo Hills kam u Enforcement Inspector ka GHADC da ong u wa ha ka 18 hadooh ka 24 tarik u Naichiphaw 2021 da lai u cha kamra kreh u Damien K. Sangma neibynta ki kaam yow yoh mynjur na oo ya ki Trading License wa da leh da kiwa khayi ka Betasing, South West Garo Hills tangwa u Damien da paan pathan u na oo T. 2000 kawi ka Trading License iwa man leh palat ya i dor wa da booh yow yoh License. Wei hadien wa pyrchah u yeini, neiliang u Damien da paan bait u ya kani ka poisa.
Kamtæ neiliang u Dibakar da sai u da ka Mobile Phone yow yoh u riñ ya ini wa paan u Damien yow pynyoo pyrthai yeini heiwa ha i Video da yoh wow riñ yei chim poisa u Damien na u Dibakar.
Tangwa ka khubor wa da mih won da ong wa u Dibakar da su poisa u ya u Damien kam chibynta wa chim ram u na u Damien wada pynmih khubor da u payu u Damien uwa tip kam u Cosmos Sangma uwa man leh kam uwa thoh khubor.
Chooh chooh da ong wa u Cosmos da maham u oo lada pteiñ u wow pynbaad ya u Damien.
Neiliang u Dibakar da ong u wa u pteiñ u wow booddien yeini yow yaleh pyrchah ya ki kaam baam-tooh.
