Ka “Yutran Inn” wa em ha Ladthadlaboh, Jowai kawa man ka thaw wada pynkhreh yow sah miet ki bru wa wan naki thaw waphær waphær, da wai paidbah ya ka ynne ka sngi da u MLA ka 2-Jowai u Wailadmiki Shylla haka yalang wa tbian wa pynlai da u S. Sayoo.
Hawa pynsñiaw yei yumut “Yutran” u S. Sayoo ong u wa hei ktien Nangbah toh ka Yubah, iwa mut yow bah yow chakri yaki paidbah deiwa pynbiang yeiwa emkaam yong ki hawa wan sah ki ha kani ka thaw najrong i baam i dih.
Kam u kongsan, u Wailadmiki Shylla da e yaroh u yaka manbei wa seiñ ya kani ka thaw sah deiwa ong kani man ko ka nongmuna ya kiwi tawon u yieñ hei yong ki dahi i kjat la hei kaam wa khian næ waheh neibhah ha kini ki sngi da saja i yoh khih sorkar.
Ong haroh u wa i em kam kani ka thaw sah u yarap bha ko ya ki bru wa wan na baar, heijooh i por kamwa ka Ri-loom Jaiñtia toh kawa boon ki thaw uiñ sawari kamtæ u rap pynsuk chooh chooh ko ya ki bru dei wym hap ware u yabeh na jngai.
Kyntu haroh u ya kiwa pynlai kani ka “Yutran Inn” wow e ki i chakri wa biang yaki bru wa wan sah katwa ye wa lah wa kynthup nadooh i baam i dih wa kiwi wei yooluti u leh u nang ku ko neipor cheipor.
Neiliang u waheh chnong ka Ladthadlaboh, u L.D. Lakiang hawa klam da pyn-ehbok pyn-ehnasib wei da kyntu u yaki bor pynlai wow pynkrehkaam ki hei rukom wa bha dei wym hoi u mih iwon iwon i wow ktah yei burom ka chnong ka thaw hadien habood.
Kiwi won wa e yei klam ha kani ka sngi kynthup ya ki MDC ka JHADC kitæ u Brightstar Chyrmang, u Octomewot Lamin wa kiwi katwa yei kyntien e khublei da yoh na u Dawan Biam wa i duwai na u Mark Rymbai.
