Kiwa sikai Adhoc hapoh ka Federation of All School Teachers of Meghalaya (FASTOM) da pynman ki da i yakhih ynne ka 17 tarik haphrang ka Secretariat wow pynsñiaw cha ka sorkar ya ki kular wa nadooh u snem 2019 neibynta wow khut yaklam ya kiwa sikai wei wow pynku noh ya ki 7,090 ngut kiwa sikai Adhoc ka jylla cha kiwa sikai Deficit.
U Kenneth Shadap, President ka FASTOM da ong u wa i sdang ya ka yakhih ka wow neh hadooh ka 20 tarik toh hajrong ka yurim wow pyrchah ya ka sorkar yei wym mano ko wow pynku kyrdan ya kiwa sikai Adhoc wei da dawa leh wa u Montri Rangbah ka jyllla toh u khut yaklam noh u ya ka FASTOM.
Da ong u wa ini i yakhih ymtoh du neibynta kiwa sikai Adhoc tangwa neibynta wow yoh hok leh ya kiwa chet ja ha skur kiwa da tip kam ki Midday Meal Workers kiwa yoh ya ka tulop kawa du T.1000 chi bnai na ka sorkar pyrdi, wei ka FASTOM da dawa ko na ka sorkar wa toh u su tulop ya ki lyngba ka State Fund neibhah ka sorkar pyrdi ym em u pynlait ko ya ka nong la 6 bnai kattu.
U Kenneth da pyntip u leh wa neiliang u Montri ka sorkar pyrdi, u Ramdas Athawale da thoh chithi u cha u Montri Rangbah ka jylla wow khut yaklam ya kiwa sikai tangwa hadooh katni ympu em u chah khut ki.
