Hadien wa ki jylla da pynmih kyndon ki wa emkaam wow rahlang waka Negative RT-PCR Test yow yoh u psiah cha ki jylla nadooh wa sdang ka la-ær wa le ka khlam COVID-19 wei deiwa em leh sa u jait Omicron. Ha Manipur da sdang chem ya ki bru wa rah da ki Negative Test Certificate wa da chna thok.
Katkam ka khubor wa mih ha ka IFP, da chem yeini ha uwi u bru wa wan da u sarok wa psiah lyngba ka Mao Gate wa rah u da ka RT-PCR Negative Test Report wa da chna thok.
Waroh kiwa wan da u sarok da sylli ya ka Test Certificate yong ki ha kani ka Gate heiwa uni u bru da pyntip u wa da thied u ya kani ka Certificate thok najan Dimapur Railway Station hei dor T. 250 chwa u poi u cha ka Mao Gate.
Da khana u leh wa ymem wa tip u pait lada ka Certificate toh kawa da chna thok lane ka yong sakhiat.
Da em leh uwi uwa da liwan na Delhi cha Imphal, Manipur da ka lieñsuiñ hadien wa khang noh ka College u wei ymem laad de da iwi lait nei liwan yung tangwa neidaw wa jhan ym yoh por wow phah Test, wei da em kiwa tipmit u kiwa na Manipur kiwa phah ya kani ka Certificate thok cha oo.
Chooh chooh da ong u wa ym du oo, kiwi leh da pynemkaam ki ya kini ki Certificate thok.
Ka Manipur da booh kyndon ko wa ya ki RT-PCR Test toh u leh 48 kynta chwa wow poi cha ka jylla.
Ha Manipur ynnin ka sngi da em 380 ngut kiwa dang yoh COVID-19 heiwa kiwa dang chah ktah da em ki 1,791 ngut.
