Hadien wa poor i Video wa pynyoo wa em ka kari khian wa chah tyrrah deiwa joor hadooh wa da pra phrai ne, neiliang u Wyrta da thooh tre chaphang ini i Video wow tip yeiwa sakhiat.
Katkam ka yutip wa da yoh iwa tikna da ong wa ini i jia tyrrah kari da jia i ha ka 19 tarik heipor kamwa 5:00 waje i janmiet ha i bynta ka Wahmynsoo yong ka chnong Mookyndur.
Ini i tyrrah kari da jia i hapyrdi ka Truck wa em Number GJ-05BX-5030 kawa kit khyndaw-bilat kawa lai cha Guwahati wa ka kari Alto 800 wa em Number ML-05M-6035.
Ha ini i jia kiwa chong hapoh ka kari Alto 800 da mynsoo joor ki wa kynthup ya u Ramesh Dkhar, u Working Phawa, u Kyrshan Phawa, u Bony Phawa, u Tikna Phawa na ka chnong Jalyiah, East Jaiñtia Hills. U Ker Sana na Shkenpyrsit, West Jaiñtia Hills, wa u Jirusmi Dkhar na Iongkalooh, East Jaiñtia Hills leh da mynsoo ki wei da kit ya ki cha Jowai Civil Hospital, Ialong da ka Ambulance 108 deilang wa ka kari pulit ka Ummulong Beat House.
Kiwa chong hapoh ka Truck wa kynthup ya u Jalal Haque (uwa yah) wa u Abdul Mutalop kiwa na Goalpara, Assam da mynsoo ki hadien wa ka Truck ki da lai tyrrah ko ha chrooh loom hadien ini wa jia wei da kit ya ki cha Civil Hospital, Ialong.
Hadien ini ya ki soo ngut kitæ u Ker Sana, u Bony Phawa, u Tikna Phawa wa u Jirusmi Dkhar da kit won cha NEIGRIHMS, Shillong.
Hadooh wa pynmih ya kani ka Wyrta ym em wa yap wei ki pulit dang pynman ki yei takit hajrong ini.
