Ka 19 tarik uni u bnai da man ko kawa sah kynmoo ya ka Seiñ Raij Barato heiwa da yoh ko ya ka Yung Dorbar ya kawa da chna dei yarap na u MDC ka thaaiñ u Aiborlang Shadap lyngba ka SAG Scheme 2019-20 heiwa da yoh leh 50 tylli ki chuki na uni u MDC.
Ha kani ka sngi u MDC ka 13 Saphai Constituency u Habahun Dkhar da man u kam u kongsan ryngkat i emlang ki dkhot wa ki manbei manpa ka Seiñ Raij Barato.
Ya ka yalang da pynlai da u L. Shadap, Chairman ka Seiñ Raij Barato heiwa da yoh ya i klam pdiang na u Secretary ka Seiñ Raij, u Salaimiki Dkhar uwa da pdiang burom wei e khublei ya u MDC ka thaaiñ uwa da yarap ya ka seiñ.
U kongsan ha kani ka sngi da yaroh wei da e khublei u ya u MDC ka thaaiñ wa da ye u wow wanrah ya kani ka Yung Dorbar ka wow pynsuk ya ki khon ka Seiñ Raij Barato wow pynman ki ya ki yalang waphær waphær neibynta ka seiñ.
Da kyntu u leh ya ki wow sumaar bha ya ka khnang wow myntoi ha ki por wow wan.
Da pynphooh pynphieñ ya kani ka sngi da i chaad wa i rwai na ki khon ka Seiñ Raij Barato.
Kiwi kiwa da e i klam ha kani ka sngi toh u A. Shadap, Ex-Chairman Chnong Barato, u Waheh Chnong Barato wa kiwi kiwi.
