Dei yarap u MLA warim, MLA thymme wa u MDC da wai paidbah yaka khnap thangbru ka Khlieh Myntriang

Ka Seiñ Raij ka chnong Khlieh Myntriang, East Jaiñtia Hills ynne ka 22 tarik u Duyatra da yoh ko u wai paidbah yaka khnap thangbru hei sakhilang u MLA ka thaaiñ u Kyrmen Shylla uwa man leh u Montri ka sorkar jylla, u Justine Dkhar MLA warim, u Lomris Lyngdoh MDC ka thaaiñ, kiwa yahkhmat ka Seiñ Raij Jowai, ki waheh chnong naki chnong wa marjan wa kiwi de.

U Joining Roy Dkhar, Rangbah Sainia Seiñ Raij chnong Khlieh Myntriang hawa pynsñiaw hajrong kani ka khnap, da ong u wa nadooh u snem 2008 da sdang ki u lai luti wei lyngba i yoh yarap poisa T. 12 lak na u Justine Dkhar da sdang ki u chna ha u snem 2018, neitæ hadien wa pteiñ i yoh yarap sa T. 7. lak na u Kyrmen Shylla wa na u Lomris Lyngdoh T. 1 lak, da ye ki u chna pyndep. 

Heiyatoh won wa i chna pynmiat ya u sarok wow lai cha kani ka khnap, ka paiñkhana wa kawi ka yung khyndaw bilat khian, da pyntip u wa da yoh yarap lyngba ka yung krehkaam u BDO.

U Justine Dkhar hawa e yei klam kam u symbood kongsan, dap u dei sñiawkmen wa da ye u pyndep ya kani ka khnap thangbru, wei ong u leh wa lada waroh kiwa mihkhmat bien bait ki u rap yei kreh wa sahteiñ, ka roi ka paar leh ku ko haka chnong ka thaw wa haka imlang sahlang.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Kamwa ka thaw wa em ka khnap thangbru man ko kawa yoosuk wei boon ki dieñ ki siej, da kyntu u yaka Seiñ Raij chnong Khlieh Myntriang wow thooh chooh chooh ki laad wow pynyoosuk khnang wow man leh ka thaw uiñke pyngngaad najrong wow pynneh yei khooid i suba.

U kongsan yong kani ka sngi u Kyrmen Shylla hawa e yei klam da pynsñiaw haroh u yaki kattu katni ki khnap thangbru hapoh ka Constituency yong oo kiwa dang lai luti katni yow chna haki chnong waphær waphær, wei e yaroh u leh yei stat ki waheh u yah luti yow em yaka khnap thangbru.

Heiyatoh won i emkaam u yoh leh yaka yung rieh slap ha kani ka thaw, neiliang u Kyrmen Shylla da kular u wow e yarap kamwa T. 2.50 lak. 

Waroh ki waheh wa e yei klam ha kani ka sngi da e yaroh ki yaka Seiñ Raij chnong Khlieh Myntriang, neibhah i yoh yaka khnap pynduna ko yei lut i sep, pynduna ko i baam por wei kamjooh leh lait nei sma.

Haka yalang wa pynlai da u Dawan-oo Dkhar, Vice President Seiñ Raij chnong Khlieh Myntriang da yoh leh i klam na u President ka Seiñ Raij Jowai u O.R. Challam, na u M. Biam, General Secretary Seiñ Khihlang, na u L. Shylla, Vice President ka Raij Tuber wa kiwi kiwi.