Ka East Jaintia National Council (EJNC) ha kani ka lyngkhooh dap 50 snem i yoh jylla wa pura ka Meghalaya da pynkynmoo ko ya ka sorkar jylla hajrong ki kattu katni tylli ki phang dawa wa ka seiñ da booh ka hakhmat ka sorkar ha kini ki snem wa da dep neibynta i emkaam wa i myntoi yong ka East Jaiñtia Hills District.
Ka EJNC ha u 2018 da phah ko ya ka dorkhat cha u Montri Rangbah hajrong ki 3 tylli ki phang dawa yong ka seiñ kitæ wow wanrah sa kawi ka C&RD Block hapoh East Jaiñtia Hills District, wow pynku kyrdan ya ka Khliehriat CHC cha ka Civil Hospital wa pura wei wow wanrah ya ka Government College hapoh ka East Jaiñtia Hills District.
Ha ka 30-01-2020 ka seiñ da phah ko sa kawi ka dorkhat cha u Montri ka chnat Puræ Puthi wow dawa na ka sorkar wow pynlait noh ya ka Scheme neibynta wow pynkrehkaam ya ki 2 tylli ki Residential School wa yaka Teacher Training Center kiwa emkaam hapoh East Jaiñtia Hills District kiwa da dep wow chna.
Chooh chooh ka EJNC lyngba ka Sumer Circle haka 15-09-2021 da pynman ko daka yakhih ha Khliehriat yow phah leh daka dorkhat cha u PWD Minister wow pynyoo yei sñiawkhia hajrong i ieh khonswet yong ka sorkar wow pynchna ya u sarok wow pynyabi ya ki 4 tylli ki chnong wa kynthup yaka Khahnar, Kseh, Pala wa Muknor kiwa haap hapoh Elaka Sumer, EJHD.
Hajrong kini ki yurim, neiliang ka EJNC da kyntu ko ya ka sorkar jylla wow chimkhia ya kani ka phang dawa yong ka seiñ neibynta i myntoi yong kiwa chong chnong yong ka EJHD khamtam ha kam ini i por waka sorkar jylla ka lehkmen ko yei dap 50 snem i yoh jylla wa pura yong i.
