U Bajop Pyngrope uwa man u MDC ka Congress na Rambrai-Jyrngam da pynsñiaw u wa daw yakhun u ya ka Election MLA kawa daw man ha u snem 2023 napoh ka Mawthadraishan Constituency kawa haap hapoh ka Eastern West Khasi Hills District.
U Bajop da klam che u leh wa ha kani ka Election MLA daw yakhun bait na ka seiñ Congress wei ym kylla wamut de wow lai chawi lada kiwa yahkhmat yong ka MPCC yoobiang ki wow e Ticket ya oo.
Chooh chooh hawa klam wa uwa thoh khubor, u Bajop da ong u wa hadien wa da lai bha wei khamtam dooh hadien wa da chah thung kam u Secretary wow pait ya ka Mawthadraishan Constituency neibynta wow pynkhlan wei pynyaar ya ka seiñ, da kreh borbah ya kani ka kaam wei kamtæ lada ki paidbah u sñiaw ki wa oo u man u kam u kyrtong wa biang dooh, daw yakhun bait ya kani ka Election.
“Hao hanla nga toh tang u MDC yong ka Rambrai tangwa nga dap oo dei kmen wa lyngba i kreh chitom yong nga hapoh ka seiñ, ha West Khasi Hills ki bru da tipmit ki ya nga wei nga da em O boon kiwa kyrchaan kiwa kwah ya nga wow mih yakhun noh na Mawthadraishan wei wot neiliang kiwa kitkaam yong ka Block ha Mawthadraishan kawa da pyndooh noh chipor neidaw wa yoh District thymme leh da dep ki wow wan yachem wow yaklam ya nga hajrong ini i kaam,” da ong u Bajop.
Da ong u wa ka seiñ Congress ka khlan bha ko ha West Khasi Hills wei khamtam ha Mawthadraishan Constituency wei yeini da sakhi leh ha ka Election MP kawa da dep heiwa hadooh kamwa 70% na iwa em ki bru hapoh kani ka Constituency da e ki yei kyrchaan ya ka Congress.
Hawa kylli hajrong ka Fenela kawa da jooh yakhun ya ka Election na kani ka Constituency, u Bajop da ong u wa toh kawa yahkhmat wa biang bha wei kawa da psiah leh cha ka Congress ha u snem wa da da dep wei da pynsñiaw ko yei kyrchaan wa pura. Da ong u leh wa neiliang u Boldness Nongrum, u Dr. Adviser Parïong kiwa toh ki MLA warim leh da pynsñiaw ki yei kyrchaan wa pura.
