U Montri Rangbah ka jylla, u Conrad Sangma hawa e yei klam ynne ka sngi ha ka lehkmen Republic Day ha Shillong da ong u wa hawa pynyoo yei maya ri ym emkaam wow pynyoo yei sñiaw yaphær jaitbru wei chong ko ha ka imlang sahlang wow pyntikna wa i wi ar iwa jia ym toh wow e laad wow jia biang wei toh u beiñ yeini kam ka imlang sahlang deilang leh wa kiwi ki seiñ.
“Toh u chim i yei kitkhlieh yow pyntikna wa burom kylliang uwi ya uwi heipor wa yaleh i yei hok yong i kam ka jaitbru wei kam ka jaitbru toh u tip i wow burom leh ya kiwi,” da ong u Conrad.
Da ong u leh hawa lai chakhmat ki khynroo yong i toh i bor bah heijooh i por wa eh dooh wow yaleh wei kam ka sorkar da sñiawthooh wa ym ye wow tuklar ha ki kattu katni ki por. Ki khynroo emkaam wow seiñ dur ya ki, wow yah luti ya ki wei toh u pynboon kaam ki da ki kaam wa mih soh mih sla.
Kamtæ lada khyrngiat manda dap ki 15-16 snem lada kylli hi-eh ya ki iyi leh ki, man ko kamwa pynbaad ya ki iwa man iwa bakla neibhah i da rem i hei kaam yong i wow e ya ki ki laad ki luti iwa da toh wow leh nadooh wa kha ya ki.
Da kdaw u leh wa hadooh wa dap ki 8 snem heipor wa i pyrkhat pyrdaiñ yong ki dang lung i emkaam bha yei yah luti deiwa biang yow heh u saan ki deiwa biang.
Chooh chooh da ong u wa ym ye wow yang hadooh wa dap ki 15,16,17,18 snem dep tæ sñiawthooh wym em leh i da iwa biang, kamtæ daw sdang ka thong krehkaam ya ki khynroo nadooh wa dang kha hadooh wa man ki kam bru wa da heh da san.
Da khana u wa yow leh ya ini da yoh plat T. 300 klur naka World Bank yow sdang ya ka Early Childhood Development Program wei daw yoh poisa leh neibynta kiwa dang khai khynroo.
Hajrong ini da ong u wa da mang chwa ya ki 1000 sngi nadooh wa kha yow pyntikna wa biang i chait i khiah wa i baam wa tei yei doh i pran.
