Ka Hynniewtrep A’chik National Movement (HANM) da pynsñiaw ko yei pyrchah yei luchia yong ka sorkar ya u Motphran uwa em hapyrdi yong ka sor Shillong, neibhah wa toh du uni u mot wa pynsahnaam ya ki khlawait ka ri Khasi kiwa da lai wow yakhun ya ka thmabah wa nyngkong cha ri France ya kiwa da tip kam ki 26 Labour Corps.
Ka HANM ynnne ka 28 tarik da lai ko wow wah leh dei thoh wa yoh ki paidbah u mylliñ ya kini ki bru wa chlur ka jaitbru.
U Vice President ka HANM, u Nelson Kharbani da ong u wa ka sorkar ym toh u luchia ko ya ki moo sahnaam næ ki moobynna, neibhah ya utai u mot da chna da ka sorkar pharæng kam i dak wow pynsahnaam ya ki chipai Khasi. Da ong u wa ka sorkar jylla ym toh leh u pyndooh pyndam ko ya ki moo sahnaam kiwa da chna da ki manchwa, ym toh wow khura katwa ngait wow pynman ki kam ki moo ka juk thymme, tangwa toh u sumaar ya ki dak u warim wajah khnang wa ki khana pateiñ yong ki warim u neh ki.
Da ong u wa ya ka Garo Labour Corps da jooh lehkmen ha ka 16 tarik u Naiynñiaw, tangwa neibynta ki Khasi ym jooh em kamtæ, wei du ha Motphran uwa em i khana yong ki Khasi kiwa lai cha ka thmabah wa nyngkong. U Kharbani da kyntu joor u ya ka sorkar wa toh u pynneh pynsah ya kini ki moo sahnaam khnang wa ki pateiñ u yoo ki ya ki dak wa sakhiat ki longchwa manchwa.
Kam wow kdaw wa ka sorkar hei pynmiat ya ka sor Shillong, neibynta wow lehkmen yei dap 50 snem, da pynkylla dur leh ya u Motphran uwa em i pyrtuid yong ki chipai Khasi 26 Labour Corps, deiwa booh ya ki bordiñ wow pynthaba, da pyntooid leh ya ki um wei da booh wa ki kchu syntu ha utai u Motphran.
