Kawa thooh bniah ya ka ktien Khasi kawa man leh kawa yoh ya ka Padma Shri Award, ka Prof. Badaplin War da ong ko wa em i sñiawthooh bakla hawa yatoh wa i myllien wow pynemkaam ya ka ktien yong kiwi namo ka ‘English’, neibhah da em i sñiaw wa ka ktien English da yoh thaw palat ko hapoh ka jaitbru Khasi. Tangwa da ong wa katkam i thooh bniah da em du kajiak kiwa pynemkaam bait da ka ktien English.
Da ong ko wa katkam i thooh bniah wa da leh ko, da em sakhiat ki manyung ki wym pynemkaam de ya ka ktien Khasi, kiwa da chim ya ka ktien English kam ka ktien wa klam ha yung, tangwa da ong ko wa lada lai rap jngai na sor ym yoh sñiaw de ya kiwa klam pharæng næ English.
Ka Prof. Badaplin da ong ko wa em i sñiawthooh bakla, wa toh leh i sakhiat wa ki bru wa chong ha ki nongbah næ sor ki pynemkaam ki ya ka ktien pharæng neibhah wa toh kawa da sñiawthooh lang salonsar, khamtam ha i krehkaam, tangwa ini ym mut wa daw dai noh ko ya ka ktien ki bei ki pa ka yong ka jaitbru.
Da pynsñiaw ko wa ym em dooh kyrmen ko neibhah lada lai cha kiwi ki chnong da klam ki dei ktien yong chnong hi. Da ong ko wa hawa pait ya ka juk wa ha pyrthai waroh kawi da em i yakhih wow pynemkaam ya ka ktien pharæng, wei ini ym khatæ noh yei maya wei burom ya i ktien yong i hi.
Ka Professor kawa man leh kawa sikai ha NEHU da e ko leh ya ka khubor wa toh u maya ya ka ktien yong i, neibhah wa emkaam sakhiat wow tip leh ya ki jait ktien kam ka English wa da man ko kam ka tiar yaleh wow kyntu ya i, tangwa heijooh i por leh toh u kynmoo ya ka rympei yong i. Ki yong i hi nadooh ka riam ka bait ym ye ko wow pyntipmit wa toh ki Khasi, tangwa ka ktien kawa ye u ksoh yei long i man kyrpang ka jaitbru hakhmat ka pyrthai.
