Ynnin i janmiet heipor kamwa 6:30 da em i pdung bomb ha Police Bazar wei ini i jia da wanrah i ym du ya i sy’ir mynsien ki paidbah tangwa wot ka liang pyrchah (AITC) leh da beiñ ko ya i wymye ka sorkar wow yada na ini.
Ki heh ka AITC da beiñ ki yeini deiwa ong wa ini pynyoo i ya i tlot ka sorkar i wym chngaaiñ ki paidbah ka jylla hapoh ka sorkar u Conrad Sangma.
U MLA ka Umroi, u George B Lyngdoh, da ong u wa i pdung Bomb ha Khyndailad, da pynthut i yei chongsuk wei da chem wa ka sorkar da man ko kawa yohthiah wow yada ya ki paidbah deiwa beiñ joor ya iwa jia.
U MLA ka Nongthymmai, u Charles Pyngrope, uwa man leh u State President ka AITC da ong u wa ki paidbah ka jylla Meghalaya ym em u chngaaiñ ki hapoh i pait u Conrad.
Neiliang u Dr. Mukul Sangma da ong u wa i pdung bomb ha nongbah toh iwa maa, deiwa kylli na u Montri Rangbah, u Conrad Sangma, iyi ini iwa jia? Da kyllli u leh, weileh ym em u ekti ki (sorkar MUA) mo ya ka jylla wa chongsuk ha u 2018?
Ka Miani Shira, MLA Ampati da ong ko wa ka sorkar jylla toh u chimkhia ko wow wanrah ya i chongsuk la man katwa man leh dei kyrmen wa kam ini ym jia de i neini chaphrang.
