Uwi na ki muktiar ka East Jaiñtia Hills uwa ka-it bha u kreh neibynta i bha i miat ki paidbah liang wanang hapoh Ri-loom Jaiñtia, ha kani ka kynti da e u da ka Open Letter namo ka chithi wow yoo paidbah cha u Deputy Commissioner ka District heiyatoh wa i sih u sarok na Khliehriat East chadooh ka chnong Rymbai.
Ha ka chithi, u Kerlang da ong u wa uni u sarok toh uwa pynyabi ya kini ki ar chnong heiwa da pynsuk u yei lai i wan ki paidbah nei sahkut kari khamtam kiwa lai lyngba u sarokbah NH-6.
Chooh chooh da kdaw u wa uni u sarok man u leh u thied-snaam hapyrdi ki yung krehkaam sorkar hapoh ka East Jaiñtia Hills, nadooh ka yung krehkaam u Deputy Commissioner, ka yung kasari District & Sessions Judge wa kiwi ki chnat sorkar tangwa katni uni u jooh u sarok da dap u du ki thlu iwa da pynthut ym du yei lai i wan ki paidbah tangwa wot iwa da booh hei maa ya kiwa lai wa wan khamtam ki khynnah skur.
U Kerlang da pynkynmoo u leh wa ha ka 23 Kmaichonglad 2021, da e dorkhat u cha u Executive Engineer ka PWD (R), East Jaiñtia Hills hajrong wow chna pynmiat (Repair) ya uni u sarok, heiwa da pynrap u wa ya kani ka dorkhat ym em wa mano ya ka.
Hajrong ini waroh da kyntu u ya u DC wow chimkhia smat yeini deiwa ong leh wa ini man i chibynta yong i hok manbru ki paidbah katkam ka riti synchaar ka ri wow yoh ya ki sarok wa ki luti syngkieñ wa miat wa bha.
