U heh ka Congress Parliamentary Party ha Khasi Hills Autonomous District Council (KHADC) u Pynshngain N Syiem da ong u wa ki MDC hadooh katni ympu pyrkhat ki wow pynyakhun kyrtong neibynta ka chuki Chairman ha KHADC.
Ka chuki Chairman ha KHADC da thylli ko hadien wa ieh kaam u Pyniaid S Syiem, wei u Lat ka jylla da phah u wow khut ya ka dorbar kyrpang ha ka 7 tarik uni u bnai wow jied ya u Chairman wa thymme, wei i thap pyrtuid u man i mynstep ka 4 tarik.
Neiliang ka liang synchaar ha KHADC, ka United Democratic Alliance (UDA) da mynjur ko ya u MDC ka NPP na Mawphlang, u Lamphrang Blah wow chong ha kani ka chuki.
U Pynshngain N Syiem da sñiawkhia u ya i phah pynman ya ka dorbar kyrpang ha ka 7 tarik deiwa khlem pait ya ka AD Rules 32 (2), kawa ong wa lada ka chuki Chairman lait ko, toh u thap pyrtuid chi sngi chwa wow pynman ya i jied. Da ong u wa ini i tyngkheiñ ya ka kyndon ka District Council heiwa hei yong sakhiat ka chnat District Council Affairs ka sorkar wa ka yong u Lat toh u lai bait ki katkam ki AD Rules khnang wow lait i tyngkhooh ha i rukom krehkaam.
Da ong u leh wa da leh jhan wow pynman ya i jied Chairman, heiwa ka Dorbar Mang Tangka ka Council u man ko ha ka 8 tarik u Wisu (Mar) wow wan, heiwa da pynrap u wa ym toh i kaam wa jhan wow khut ya ka dorbar kyrpang neibynta wow jied ya u Chairman neibhah u Deputy Chairman em hi u wow pynlai ya ka Dorbar.
