Ka Seng Khasi Kmie, lyngba ka Lum Sohpetbneng Committee deilang wa ka Komiti U Tymmen U San da pyndep ki ya ka ‘Kiew Pyneh Rngiew’ kawa chi sien chi snem cha khlieh u loom kyntang ka jaitbru, u Sohpetbneng kawa da man ynne ka sngi Bibar.
Ya kani ka ku Pyneh Rngiew, da pyndep deilang wa i bood kyndon wa da prat dak da ki bor synchaar deiwa khlem em boon palat i ya wan wow ya ku paidbah, tangwa kiwa wan u man ki du ki dkot kitkaam ka Jylli Pyrkhat Kam, ka Komiti U Tymmen U San, ki dkhot ka Lum Sohpetbneng, neitæ ki khmat wa yahkhmat Sein Raij Shillong wa Jowai, kiwa yahkhmat yong ki Jylli (Circle) wa ki chnat Seng Khasi.
Chwa wow ku cha khlieh u Sohpetbneng, U Tymmen U San, da pynman chwa ya ka ngooh ka dem, ha khyrdop kawa em mar pyrchah wa ka nan Umiam, heiwa heini da chim ya u khoo, ka um wei da pynman ya ka ngooh ka dem ka duwai ka phirat, wei kamwa da dep wow sdang nadooh ka sngi yong ka Chi Hat ka Chi Tayaw yei pyndep ya ka lehniam ka leh rukom ha Lum Dorbar Lawnongthroh, ha ka Mei Mawbuh wa ha u Sohpetbneng, wei ryngkat u Syiem Mawshun, wei i pynthiah charood chakiar ya ka sabuit ka sakai, ka dani ka dai kot ka saw-bniat ka saw tyngam.
Manda dep na khyrdop, da toh won ka pali wow sdang i ku cha kliar u Sohpetbneng, heini da yoh ya i kyntien maitphang na u Rgh I. Sun, Chairman Lum Sohpetbneng Committee ka Seng Khasi Kmie, uwa da pynche yei yumut wei thmu wow ku cha khlieh u Lum Sohpetbneng, kam i ku pyneh rngiew man ko i pynkhai im won ya ka ‘Nguh Ryngkew Basa’, ka duwai ka phirat khnang wow bha u biang ka rep ka riang, wow pynneh wei pynsah deiwa tyngkai yeiwa da e da booh ka ‘Lei Mariang’ wei wow yoh leh ya ka khiah krat ka khiah stang.
Kamwa U Blai Tre Kynrad, uwa booh wa thaw da pynkup u ha u Ynñiawtrep Ynñiaw Wasa ya i maya ha i man niam ka long rukom ha ki ‘Lai Mawbyrsiew’ kiwa man ki sap tynre wow Tip Bru wow Tip Blai wow Tip Kur Tip Kha wei wow Kamai Yei Hok.
Hawa tkut u Sohpetbeng, ka Yingkieñ Ksiar heiwa u bru da san wei yieñ rangbah ha ki kjat itæ wow Yieñ Rangbah u Bru wow ap Yutang U Blai, kamwa u Sohpetbneng uwa da jooh kheiñ kyntang hadooh kattæ kattæ, da yieñ tyngkreiñ wow sakhi ya u sapet kha u sapet kur wa i wan wow manbru Ynñiawtrep Ynñiawskum u Ynñiaw Wasa.
Ya ka ngooh ka dem da pyndep da u Rgh. Skor Jala uwa da jied ya u Chairman ka Komiti U Tymmen U San ka Seng Khasi Kmie deilang wa i e synran lang kiwa yahkhmat ka Sein Raij wa ki dkhot ka JPK.
Hadien wa da dep ka ngooh ka dem ka pynsum ka pynsait ya ka duwan ka dupat, da wailaad ya ki parakur parakha wow ku ki hajrong ka duwan ka dupat, wow e ki ya ka ngooh ka dem ka duwai ka kyrpaad ka kyrpon ha U Blai Tre Kynrad wow theh sai u ya ka kyrkhu kyrdoh najrong na tbian næ wow maap leh ya ka lait ka let bru.
Manda leh ya ka ngooh ka dem, da saam leh ya u ‘Khaw-eh u Khawshan u Khawkhein’ wow rah cha yung cha sem wei wow e baam chi symboh ar symboh wei wow tong won ya ka um ksiar ka um rupa wow dih khnang wow eh ka rngu wow yoh ya ka kyrkhu wa dap kyrhai na U Blai Trei Kynrad.
