U Montri Rangbah ka jylla, u Conrad Kongal Sangma da ong u wa i wan psiah ki 5 ngut ki MLA ka Congress cha ka sorkar Meghalaya Democratic Alliance (MDA) ym ktah i yei yatoh wa kiwi ki seiñ wa da em chwa ha ka sorkar.
Da ong u wa da rai wa ki seiñ wa synrop wa ka sorkar u pteiñ ko khlem i leh chiliang næ iehbeiñ ya kiwa da em ha ka sorkar nadooh wa sdang hi.
U Conrad uwa man leh u National President ka NPP da ong u wa pdiang u yei tyrwa ki MLA ka Congress, wei da pyntip u leh wa ki 5 ngut ki MLA ka Congress da ekti ki ya ka chithi wow e i kyrchaan wa pura ya ka sorkar Meghalaya Democratic Alliance (MDA) wow yakrehlang wow pynkhlan chooh chooh hawa chim ya kawon kawon ka rai neibynta i myntoi ki paidbah.
Hawa kylli heiyatoh wa i emlang ka BJP wa ka Congress ha kani ka sorkar iwa ympu jooh jia, u Conrad da ong u wa ha ka saiñhima sima ym em kiwa man lok bait næ kiwa ya choon bait deiwa ong leh wa waroh ki seiñ kreh ki neibynta i myntoi ki paidbah.
Da ong u leh wa hajrong ki yurim wa ka Congress da e ko yei krehlang neibynta i myntoi ki paidbah, wei hawa ka sorkar sñiaw yahaap ko, ka sorkar da man ko kawa smat wow krehlang.
Chooh chooh chooh da ong u wa i yaphær toh du ha ki Party, katwa ha ka sorkar hi i yakreh u man hi i neibynta ki paidbah.
