Ka seiñ Khooid Ya Ka Wah Myntdu hei lai luti yong ka u thooh ki laad ki luti neibynta u yada yaka wah Myntdu, ha kani ka kynti da chim ko sa yaka rai u pyndooh pyndam noh i pynemkaam Plastic deiwa khut i yakrehlang kiwa chong chnong ka sor Jowai kamjooh kiwa marjan, wei u kyntu yaki District School Education Officer yong ki ar District ka ri-loom Jaiñtia u pynpsiah yaka wah Myntdu kam ka lynnong hapoh ka Subject Environment Studies.
I chim rai ka Khooid Ya Ka Wah Myntdu u dam noh i pynemkaam Plastic toh wa hei lai li pait yong ka ini wadep chem ko wa ki chariñ ki nala wa tooid chaka wah Myntdu da syrtap daki Plastic iwa booh hei maa yaka wah haki por slap wow wan.
Katwa i angnood u pynpsiah noh yaka Wah Myntdu kam ka lynnong haka Subject Environment Studies toh hajrong ka yurim wa ki khynnah skur ki khynroo khyllood puræ u sñiawthooh wei tip ki yei kordor ka wah Myntdu kawa yoh i nadooh ka um, ka la-ær, ka bordiñ wa i bor wa em haka, najrong wa man leh ka wah bah kawa kai chadoh ri Bangladesh.
U President yong ka seiñ u K.L. Pariat khana u wa haka yalang wa da pynman haka 5 tarik uni u bnai da kyntu kyrpang ki ya u Deputy Commissioner ka West Jaiñtia Hills wow e noh ka hukum wa kyrpang yaka Water Resource Department kawa toh u pait yaki wah wow pynkrehkaam næ pait noh yaka wah Myntdu, neibhah ki Scheme naka sorkar pyrdi lyngba ka Ministry of Water Resource boon bha ki iwa yatoh u pynneh pynbha yaki wah, neitæ i daw ka wah Myntdu leh emkaam ko yei kyrchaan ka sorkar.
“Kamwa yoo i haka 23-12-2021 neiliang ka Water Resource Department wa ka District Administration kam chi bynta i pynemburom yei dap 75 snem ka ri India da pynbna wada tipmit yaka wah Myntdu kam kawi naki wah wa emkaam hapoh ka jylla Meghalaya, wei neitæ i daw haka General Meeting da chim ki ka rai wow kyntu ya u Deputy Commissioner ka West Jaiñtia Hills waka sorkar jylla wow tipmit wei u sumaar u pynbha yaka wah Myntdu lyngba ka Water Resource Department,” ong u K.L. Pariat.
Da ong leh wa ka seiñ Khooid Ya Ka Wah Myntdu u yakrehlang ko waka yung krehkaam u DC West Jaiñtia Hills deilang waka Task Force Committee kawa da ebor da u Lat ka jylla ha u Naitung (Apr) 2021, hajrong ka thong yong ka sorkar jylla u thooh ki laad neibynta u pyndooh pyndam yaki Plastic kiwa pynemkaam du chisien donhi.
Heijooh i por ka seiñ ong ko kamwa kiwa chong chnong em ki ka bynta wa khroo haka imlang sahlang, kamtæ neini chakhmat toh u rah noh da ki muna na yung hawa lai yaw deiwa yait nei pynemkaam Plastic.
Da kyntu leh wa ha kiwon kiwon ki yalang i khawai toh u sangeh noh i pynemkaam Plastic nadooh ki klong, ki khuri wa kiwi ki jait Plastic, kamjooh ki khynnah skur leh toh u sangeh noh i thied yei baam wa song Plastic neibynta i chiat i khiah yong idæ.
Heijooh i por pyntip ki wa haka General Meeting wa man haka 5 tarik uni u bnai ka KYWM da pynthymme haroh ko ya kiwa kitkaam yong ka wa kynthup ya u K.L. Pariat kam u President, u R. Shylla kam u Vice President, u P. Suchiang kam u General Secretary, u H. Dkhar kam u Asst. Secretary, u O. Shylla kam u Finance Secretary waki 15 ngut ki Executive Member wa kynthup ki waheh chnong wa kiwa chong chnong ka Jowai.
