U Montri Ryngbah ka sorkar jylla u Conrad K Sangma ynne ka sngi da wan wai u ya ka thaw sumaar St. Vincent De Paul Health Care Centre kawa em ha Bishop’s House, Lumbihsyntu, Mihmyntdu, West Jaiñtia Hills hei emlang u Lahkmen Rymbui u Montri ka chnat puræ puthi, u MLA ka Jowai u Wailadmiki Shylla, u George Lyngdoh MLA ka Umroi, u H.M. Shangpliang MLA ka Mawsynram, ki MDC ka JHADC wa kiwi kiwi.
Chwa wow wai ya ka St. Vincent De Paul Health Care Centre da yoh i duwai kyrkhu ya kani ka thaw da u Most Rev. Victor Lyngdoh DD uwa man u Archbishop ka Shillong Archdiocese.
U Conrad hawa e i klam da kyrmen u wa kani ka Centre daw yarap ko ya ki bru na jan wa na jngai wei wow e chakri ko deiwa biang ya ki paidbah.
Da sñiawkmen u leh hawa yoo ya ki kaam wa khian hanla man ki katwa man tangwa da ye ki wow yarap ya ki paidbah.
Chooh chooh da ong u wa nadooh nachwa da yoo wa iwon iwon i jait yarap wa e ya ki Balang man iwa myntoi bha neibhah toh ki kiwa ye wow pynkreh hok ya i yarap neibynta wow chakri ya ki paidbah deiwa kular leh wow e yarap cha kani ka thaw sumaar wow pynjanai chooh chooh ya i chakri yong ka.
U Conrad da pyntip u chaphang ki kaam pynroi hapoh ka Jowai Constituency heiwa da ong u wa sorkar da pynlait ko hadooh kamwa T. 250 klur wow wanrah ya ki kaam pynroi ha Jowai wa kylleiñ ki chnong.
Ha kani ka sngi da yoh leh i klam na u Most Rev. Victor Lyngdoh, u Lahkmen Rymbui, u Wailadmiki Shylla wa kiwi kiwi.
