U Nehemayah Tyngkan ynne ka sngi da pynbna u wow yakhun ya ka Election MLA 2023 na Mowkaiaw Constituency, heiwa ynne hawa yaklam wa kiwa pathai khubor da ong u wa ha ka Election wa dadep (2018) da rem u du da 300 vote we kyrmen skem u wa ha kani ka kynti dei kyrchaan ki paidbah, ki khynroo wa u Blai daw ye u wow poi ha ka thong wow kreh ya ka Constituency, ka District wa ka jylla hi waroh kawi.
Da ong u wa hapoh ka Constituency em palat 78,000 ngut ki bru (kiwa kynthup na ki khynnah hadooh ki tymmen) tangwa man ko kawa sahdien dooh na waroh ki Constituency hapoh ka Ri-loom Jaiñtia.
U Nehemayah da booh thong u leh wow kreh lada chah jied u kam u MLA wei kitæ kynthup ki nadooh i chait i khiah, i stat i tip, i rep i riang, i yoh khih yoh kreh, ki kaam yalehke Sports wa kiwi kiwi.
Heijooh i por da ban joor u leh wow kreh neibynta wow pynku kyrdan noh ya ka Laskein C&RD Block cha ka Civil Sub-Division.
Heiyatoh wa ka Party ka wow yakhun u neibhah wa ha ka Election wa dadep da yakhun u na ka Congress wei katni man u leh kam u dkhot ka Party, neiliang u Nehemayah ym em u ong u iwon iwon hajrong ka Party deiwa pynrap donhi wa ini daw yah i kamwa yah i por.
Hajrong kini neiliang u Nehemayah da kyrpaad u ya ki paidbah wow e ki ya i kyrchaan ya oo ha kani ka kynti khnang wow ye u kreh pura neibynta ka Constituency waroh kawi kamwa da thrang da angnood ki.
