U Vice President ka Bharatiya Janata Party (BJP) uwa pait leh ya ka Party ha Meghalaya, u M. Chuba Ao da ong u wa ki 5 ngut ki MLA ye ki wow chah jied na ka Congress, tangwa da pdiang ki ya ka yurim wa ki thong krehkaam ka BJP, neibhah lada ymtoh wa pdiang ki ymbien ki wow krehkaam ha ka sorkar wa em ka BJP.
Hadien wa lai kyrchaan ki 5 ngut ki MLA ka Congress ya ka sorkar MDA, ka BJP ynne ka sngi da chong yalang da ka Core Committee, heiwa da rai wow paan pynche na u Montri Rangbah ka jylla, neibhah wa ym em u pyntip chwa wow pdiang ya ka Congress ha ka sorkar.
Da ong u wa ym eh wow pdiang ya ka Congress wow krehlang ha ka sorkar wa em ka BJP, wei da ong u leh wa i kyrchaan ka Congress ya ka sorkar synrop Meghalaya Democratic Alliance (MDA) pynyoo ko yei tlot ki, neibhah kamwa da yoo ym em de ki iyi iyi leh tangwa kwah ki du wow pynyoo wa dang sah dang em hi ki.
Hawa kylli, u Ao da ong u wa ka thong yong ka BJP toh wow pynwiar noh ya ka Congress na Meghalaya (Congress Mukh Meghalaya), deiwa pynrap wa ka Congress kawa man ka National Party ym em ko wot tang ya u President wa pura iwa pynyoo wa toh ka seiñ kawa da jan haap, wei du neibynta wow neh ki, hap lai yakrehlang ki wa kiwon kiwon ka seiñ, lada wa ka BJP, NPP, UDP næ kiwi kiwi.
U heh ka BJP da ong u leh wa ymtoh ka BJP kawa kwah wow krehlang wa ka Congress, tangwa toh ka Congress kawa kwah wow krehlang wa ka BJP ha Meghalaya, neibhah wot ki MLA ka Congress da tip ki wa ka BJP emlang ko ha sorkar tangwa da wan ko wow krehlang.
U Ao da ong u leh wa ka BJP ym randien ko næ u mih naka sorkar MDA wa yahkhmat ka NPP, tangwa kiwon kiwon ye ki wow ksohkti lang ha ka sorkar wow khlan chooh chooh.
