Hadien wa pynbaad da kawi ka seiñ wa tip kam ka Meghalaya People’s Social Organization (MPSO) wa ya ka khubor wa da pynmih da kawi ka laad pathai khubor na Ri-Bhoi kawa tip kam ka Ri-Bhoi News da pyndam ya ka hadien wa da dep pynmih ha u YouTube Channel neidaw wa da phah da u President ka Shillong Press Club (SPC) heiwa kani ka khubor toh chaphang i joor wa mih tdem na kawi ka karkhana wa em ha Byrnihat wa tip kam ka CMJ Breweries.
Hadien wa pyndam ya kani ka khubor, neiliang ki dkhot ka MPSO da lai won ki cha ka laad pathai khubor kawa na Assam kawa tip kam ka News Nest yow ong wa u President ka SPC da phah pyndam u ya kani ka khubor kawa da lai sylli ki hadien wa yoh ya ka ujor na kawi ka skur pyrchah ya kani ka karkhana.
Hadien wa mih nyngkong ka khubor ha ka Ri-Bhoi News, neiliang u tre ka karkhana da kynjoh ktien u cha u President ka SPC yow yoh laad u pynche neiliang yong ki heiwa hadien wa yaklam u President ka SPC wa u tre ka Ri-Bhoi News, neiliang yong oo leh da sñiaw u yei bakla wa pynmih khubor khlem da yoh wow yaklam u ap yeiwa ong yong waroh ki arliang kamtæ da pyndam noh u ya kani ka khubor wa da pynmih ki ha ka Internet.
U President ka SPC da ong u wa kam kiwa thoh khubor ym kwah ki wow leh chiliang wei wow kreh yow pynmih khubor deiwa leh yeiwa biang dooh ya waroh ki liang.
Neiliang ka Ri-Bhoi News da ong ki wa ha ka khubor wa pynmih ki ym em ong ki iyi iyi leh chaphang u President ka SPC wei da pyndam ya ka khubor deiwa phah u tre ka Ri-Bhoi New hi khlem da em kiwa pynbor.
Neiliang ka CMJ Breweries leh da ujor ko cha u SP ka Ri-Bhoi pyrchah ya ka MPSO deiwa ong wa em du kam ka donhi ka jait karkhana wei da leh ki ya waroh ki jait katkam ka aiñ wei i rukom kreh ki leh man ko katkam ka juk wa katni. Wei du hapoh ka karkhana yong ki da em 1000 ngut ki wareh kiwa man ki tre chnong ka thaaiñ heiwa da yoh yaroh ki leh na u Montri Rangbah ka jylla.
Chooh chooh da ong wa yei rukom pynkrehkaam ya ka karkhana da wan wow pait wow sylli da ka MSPCB dei langær wei ki ym toh ka jait karkhana kawa pynmih tdem. Da kdaw leh wa hadien wa wan pait ki pulit ya ini wa chah pynbaad ka karkhana, da chem ki wym em tdem kamjooh leh ym em iyi iyi i ood wei sawa ki tiar ki tar wa pynemkaam ki. Wei lada mih tdem lada ood ki tiar toh du heipor wa sdang donhi ya ki kor.
Kam ka karkhana da ong leh wa ki krehkaam ki leh wa ki bor ka chnong deiwa e yarap katwa ye.
Da pyntip leh wa ka seiñ MPSO toh kawa da jooh wan paan yarap poisa yow pynman ya ka Pre-Christmas Charity yow e yarap cha ki khonswet wa kiwa da heh rta kamjooh wow saam kymmor iwa da e yarap bait ka karkhana.
Neiliang ka SPC da ujor ko leh ya ini i kaam cha u DC ka Ri-Bhoi wei da phah lang cha ka Chief Secretary ka jylla wa cha u General Secretary ka Guwahati Press Club wa da pynbood naam wei pynsih ka MPSO yei pyrtuid ka SPC.
