Ynne ka sngi da pynman ya ka yalang heiyatoh wa ka FOCUS kamjooh leh ka SHG Mela ha chnong Latyrke, East Jaiñtia Hills heiwa u Montri Rangbah ka jylla, u Conrad Sangma da man u kam u kongsan katwa u Montri ka sorkar wa pait ya ka chnat Bhalang u Kyrmen Shylla da man u kam u symbood kongsan.
Ha kani ka sngi neiliang u Kyrmen Shylla hawa e i klam da ekhublei u ya u Conrad wa da wan u cha kani ka chnong heiwa da man u uwa ar na ki Montri Rangbah wa da wan cha kani ka chnong wei itæ leh hadien 11 snem.
Da pynsñiaw u yei mynsien wa kmen ya ki SHG wa ki manbei wa da sdang yieñ ki ha ki kjat yong ki dahi khlem yang namo wow chaniah du ha ki chynrang.
Chooh chooh da ong u wa i em ka NRLM yong ka sorkar India da kyrchaan bha ko ya ki kynthai hapoh ka jylla ha kini ki snem.
Neiliang u Conrad Sangma da pyntip u ya ka thong krehkaam ka sorkar deiwa ong u wa ha ki snem wa dadep ki warep wa ki kynthai da chem chitom bha ki wei kamtæ ka sorkar emkaam wow yarap ko ya ki deiwa sdang ya ka FOCUS wow e T. 5000 cha waroh ki manyung ki warep ka jylla iwa kynjoh T. 200 klur deiwa booh leh ki kyndon.
Da batai yillu u leh ya i rukom krehkaam ka FOCUS heiwa da sdang ya ki seiñ ki warep namo ki Producers Group heiwa uwi uwi u dkhot u yoh yarap u wei ymye wow yoh yarap ar ngut na kawi ka manyung.
Ynne ka sngi da saam ya ki Cheque wa kynjoh T. 24.95 lak cha ki 46 tylli ki Producers Group yong ka Saipung Block wei T. 30 lak cha ki 60 SHG hapoh ka Community Investment Fund ka NRLM.
Da ong u wa ya kani ka poisa daw ye u pynemkaam ha i kaam rep nadooh wow thied symbe, sboh, ka bai kari wa kiwi kiwi katkam i emkaam.
U Conrad da ong u leh wa i wan yong oo wei i e klam ynne ym myntoi i lada ki sahep ki chnat sorkar ym ye ki wow kreh wow wanrah yei kylla hei rukom im ki bru.
Ha kani ka sngi da booh leh ya ki dukan ki chnat sorkar wa ki SHG wei neiliang u Montri Rangbah leh da lai sakhi u ya ki wei da yaklam u leh ya ki dkhot ki SHG kamjooh wa ki warep.
