Khaddooh da wai noh ya ka Khliehriat 100 Bedded Civil Hospital 

Ynne ka sngi da man ko kawa sahkynmoo ya ki paidbah ka East Jaiñtia Hills kam ka District heiwa ki 2 lak ngut ki paidbah hapoh yong ka da yoh ki ya ka Khliehriat 100 Bedded Civil Hospital kawa da wan wai da u Montri Rangbah ka jylla, u Conrad Sangma kam u kongsan hei emlang u Montri ka sorkar jylla uwa man leh u MLA ka Khliehriat, u Kyrmen Shylla wa kiwi kiwi de. 

Ya kani ka thaw sumaar da chna da ka sorkar jylla wei da tei leh ya ka lyngba i yoh yarap sñiawbha na ka Round Table India Shillong, Round Table Trust kawa da e ya ka COVID Ward heipor wa wan ka khlam COVID-19 heiwa kani ka seiñ da e yarap ko T. 1.5 klur neibynta ki pyllong wa kiwi ki tiar sumaar. 

Ha kani ka sngi u u Kyrmen Shylla hawa e i klam da ong u wa da slem wow wai ya kani ka thaw sumaar tangwa ynne da yoh wow wai noh ya ka deiwa ekhublei ya u Conrad wa da kreh u wow wanrah ya ki kaam pynroi. 

Da ekhublei u ya kiwa kreh ha i chait i khiah wa da kreh wow yada ya kiwi deiwa kyntu ya ki wow kreh chitom neibynta ki paidbah. Da yooluti u leh wa kani ka thaw sumaar daw ye ko wow e chakri ya ki paidbah ha ki snem wow wan.

Related posts

Da boonsien dep u yasyllok wa kiwa chongdai madan, phylla u Paul yei pynbaad wa leh yabor

November 24, 2024

Da 4 lak tam ki Vote jop ka Priyanka Gandhi ha ka Election wa nyngkong yong ka

November 23, 2024

U Conrad ynne ka sngi da dap u dei mynsien wa kmen wa da ye wow wai noh ya kani ka thaw sumaar hanlada chimpor wow wai ya ka. 

Da ong u wa heipor wa wan ka khlam COVID-19 ympu tip kammon u yakhun pyrchah ya ka tangwa nei kyrchaan kiwa kreh ha i chait i khiah da ye wow yaleh pyrchah deiwa ekhublei kyrpang ya kiwa da kreh neibynta wow yada ya kiwi. 

Chooh chooh da ong u wa ka sorkar MDA da yaleh ko katwa ye wow pynjanai ya ki thaw sumaar deiwa pynku kyrdan ya ki kamjooh leh wow pynboon ya kiwa kreh ha i chait i khiah. Da pynrap u leh deiwa ong wa ka sorkar da pynmiat ko ya ki thaw sumaar nadooh kiwa khian kam ki Sub Centre wa ki PHC heiwa da ye chiboon wow e i chakri ya ki paidbah. 

Heijooh i por ka sorkar da pynchlur ko wow yada pyn ya idæ deiwa baam da iwa tei yei doh i pran, wow lai phah sylli neipor cheipor ha ki thaw sumaar. 

Da ban joor u leh wow yada ya ki kynthai wa ki manbei khamtam kiwa punkhon, i chait i khiah ki khynnah kamjooh leh ki kynthai wa khai khyllood wa kiwi kiwi.